Եվ այսպես Ուկրաինայում պատերազմի 83-րդ օրվա ամփոփումն սկսենք առավոտյան նորություններով։

• Երկուշաբթի երեկոյան Լվովի լրատվամիջոցները հայտնել էին մարզի տարածքի հրթիռակոծության մասին։ Ավելի ուշ լրատվամիջոցները հայտնել էին, որ հրթիռակոծվել է ռազմական օբյեկտներից մեկը, որը գտնվում է լեհական սահմանի մոտ։
• Ռուսաստանցի զինվորականները շարունակում են ուժերը կենտրոնացնել Դոնեցկի ուղղությամբ՝ հրետանային հարվածներ հասցնելով ուկրաինական ենթակառուցվածքների վրա։
• The New York Times-ը գրում է, որ ԱՄՆ սենատը օրենսդրական նախագիծ է մշակում, որն ամերիկյան դատավորներին թույլ կտա քննել ռազմական հանցագործությունների գործերը, եթե նույնիսկ ոչ հանցագործները, ոչ էլ զոհերն ամերիկացիներ չեն։
• Սանկտ Պետերբուրգում զինկոմիսարիատներից մեկը մասնավոր ընկերությունից պահանջել է իրենց ավտոմեքենա տրամադրել՝ մոբիլիզացիոն կարիքների համար։ Քաղաքացիները պարտավոր են դա անել միայն պատերազմական ժամանակ, իսկ իրավաբանական անձինք՝ զորահավաքի հայտարարումից հետո։

Ժամի քաղաքական գլխավոր նորությունն էլ այն է, որ Շվեդիան ՆԱՏՕ-ին պաշտոնապես անդամակցելու հայտ ներկայացրեց։

Շվեդիայի արտաքին գործերի նախարար Ան Լինդեն ստորագրել է ՆԱՏՕ-ին անդամակցության հայտը։ Այդ մասին հայտնում է TACC գործակալությունը՝ հղում անելով ռազմական դաշինքում Շվեդիայի ներկայացուցչությանը։

Բրիտանական ռազմական հետախուզությունը Ուկրաինայում առկա իրավիճակի մասին

• Կիևից հյուսիս Չեռնիգովի մարզում ավերվել կամ վնասվել է մոտ 3500 շինություն։ Վնասի 80 %-ը հասցվել է բնակելի շենքերին։
• Այդ վնասի չափը վկայում է Ռուսաստանի պատրաստակամության մասին, օգտագործելու հրետանին բնակավայրերի դեմ, ընտրողականության և համաչափության մինիմալ հաշվի առնմամբ։ Հավանական է, որ Ռուսաստանը առավել հաճախ է դիմում անկանոն հրետանային կրակին՝ թիրախների որսման սահմանափակ հնարավորությունների պայմաններում, ինչպես նաև այդ երկիրը չի ցանկանում ռազմաճակատի սեփական գծից մարտական ինքնաթիռների թռիչքի ժամանակ ռիսկի դիմել։
• Առաջիկա շաբաթներին Ռուսաստանը, հավանական է, կշարունակի էական շեշտադրում դնել զանգվածային հրետանային հարվածների վրա՝ փորձելով վերականգնել Դոնբասում իր առաջխաղացման տեմպը։

Latest Defence Intelligence update on the situation in Ukraine - 17 May 2022

Find out more about the UK government's response: https://t.co/GwwPZ9lX8D

🇺🇦 #StandWithUkraine 🇺🇦 pic.twitter.com/PuqLnVGj0Q

— Ministry of Defence 🇬🇧 (@DefenceHQ) May 17, 2022

Կուրսկի մարզի նահանգապետը հայտնել է Ուկրաինայի հետ սահմանին գտնվող գյուղի ռմբակոծման մասին։

Նահանգապետ Ռոման Ստարովոյտը տելեգրամյան իր ալիքում հայտնել է, որ մայիսի 17-ին առավոտյան 05:00-ին Գլուշկովսկու շրջանի Ալեքսեևկա սահմանամերձ գյուղը ենթարկցել է խոշոր տրամաչափով զենքից ռմբակոծության։ 

Նրա խոսքով՝ վնասվել է երեք սեփական տուն, դպրոցը և մեկ ավտոմեքենա։ Տուժածներ չկան։

«Մեր սահմանապահների պատասխան կրակով ռմբակոծությունն արագ ճնշվել է»,- ասել է Ստարովոյտը։ 

Արևմուտքում կարծում են, որ Պուտինն անձամբ է իրականացնում Ուկրաինայում զորքերի կառավարումը՝ «գնդապետի մակարդակով»։

The Guardian-ի փոխանցմամբ, որը հղում է անում իր արևմտյան ռազմական  աղբյուրներին, Ռուսաստանի նախագահը այնքան է անձամբ ներգրավված Ուկրաինայում պատերազմին, որ ընդունում է օպերատիվ և մարտավարական որոշումներ։ Այդպես, նա օգնում է որոշել Դոնբասում ուժերի տեղաշարժը։

Պարբերականի զրուցակիցները պնդում են, որ Պուտինը նախկինի պես սերտորեն համագործակցում է ՌԴ ԳՇ պետ, գեներալ Վալերի Գերասիմովի հետ։ «Մենք կարծում ենք, որ Պուտինն ու Գերասիմովը մասնակցում են այնպիսի մակարդակում մարտավարական որոշումների կայացմանը, որը սովորաբար անում է գնդապետը կամ բրիգադի գեներալը»,- ասել է բրիտանական պարբերականի ռազմական աղբյուրը։

The Guardian-ը այլ մանրամասներ, որոնք կհաստատեն այս պնդումը, չի ներկայացրել։ Պարբերականը նշում է, որ նման պնդումներն արվում են հետախուզական տվյալների հիման վրա։ Կրեմլը դեռևս չի մեկնաբանել այս լուրը։

Լուսանկարը՝ Reuters գործակալության