Խորհրդարանն արտահերթ նիստում առաջին ընթերցմամբ քննարկեց և ընդունեց Կառավարության ներկայացրած «Քրեակատարողական օրենսգիրքը», որն ամբողջովին նոր հայեցակարգ է:

Հիմնական զեկուցող արդարադատության փոխնախարար Արփինե Սարգսյանը հիշեցրեց, որ նախորդ տարի ընդունվել են Քրեական և Քրեական դատավարության նոր օրենսգրքերը, և ներկայացվող փոփոխությունները դրանց տրամաբանական շարունակությունն են:

«Ամբողջ օրենսգիրքը կառուցված է այն տրամաբանությամբ, որ յուրաքանչյուր դատապարտյալի հետ պետք է անհատական աշխատանք տարվի: ՔԿՀ մուտք գործելուց հետո կարանտինային բաժանմունքում յուրաքանչյուր դատապարտյալի վերաբերյալ կազմվելու է պատժի կրման անհատական պլան, և երեքից վեց ամսվա պարբերականությամբ այն վերանայվելու է: Այս կերպ թիրախային միջոցառումներ կիրականացնենք բոլոր դատապարտյալների համար»,- ասաց նա:

Փոխնախարարի խոսքով` այլևս չեն լինելու դեռևս խորհրդային տարիներից ժառանգված ուղղիչ հիմնարկների տեսակները` բաց, կիսաբաց, կիսափակ, փակ, նաև բուժական:

«Լինելու է երեք անվտանգային գոտի` ցածր, միջին և բարձր, բուժական առանձին տեսակ չի լինելու: Գոտիները առանձնացրել ենք այն տրամաբանության շրջանակներում, որ անհատական պլանավորման հիմքում պետք է ընկած լինի դատապարտյալի ռիսկերի և կարիքների գնահատումը: Անձինք պետք է տարանջատվեն ըստ ցածր, միջին և բարձր ռիսկայնության շրջանակների: Նույն գոտու շրջանակներում ունենալու ենք երկու տարբեր պայմաններ` մեղմ և խիստ, կապված դատապարտյալի վարքագծից»,- ասաց Արփինե Սարգսյանը:

Արդարադատության փոխնախարարի խոսքով` բուժական ՔԿՀ-ի գործունեության վերաբերյալ խնդիրներ կան, քանի որ դատապարտյալներից շատերը ցանկանում են տեղափոխվել «Դատապարտյալների հիվանդանոց», քանի որ այն կիսաբաց կացարանային պայմաններ ունի, և տրամաբանական է, որ դատապարտյալները տարբեր քայլերի են դիմելու, որպեսզի օրինակ՝ փակ ռեժիմից հայտնվեն այնտեղ:

«Բուժական ուղղիչ հիմնարկում չենք կարողանում անհատականացված պլանավորումն ապահովել: Յուրաքանչյուր դեպքում հիմնարկում կգործի կամ ստացիոնար բաժանմունք կամ ամբուլատոր հատված, որտեղ բուժսպասարկում կիրականացվի:

Ըստ փոխնախարարի` փոփոխությունների նպատակն այն է, որ «Դատապարտյալների հիվանդանոցում» լինեն տարբեր գոտիներ, որպեսզի փակ խցային պայմաններից դատապարտյալը տեղափոխվի նմանատիպ պայմանով սենյակ և ստանա համապատասխան բուժօգնություն:

Փոխնախարարը հայտնեց, որ ձևավորվելու է վերասոցիալականացման հանձնաժողով, և կարանատինային հատվածում կազմվելու է դատապարտյալի համար անհատական պլան: Հանձնաժողովում ներգրավված է լինելու հոգեբան, սոցիալական աշխատող, անվտանգության, օպերատիվ ստորաբաժանման աշխատակից, բոլորը միասին մշակելու են անհատական պլան, որ հիմնարկից դուրս գալուց հետո անձը ուղղված լինի, և կրկնառիսկեր չլինեն:

Հիմնական զեկուցողի խոսքով` ՔԿՀ ծառայության հաստիքացուցակը կվերանայվի: Ըստ միջազգային գնահատականների` 3-4 դատապարտյալին բաժին է ընկնում մեկ աշխատակից, այդ տրամաբանությամբ էլ վերանայումը կլինի, սակայն բժշկական օգնության անձնակազմից կրճատումներ չեն լինի:

Պետական-իրավական հարցերի մշտական հանձնաժողովի նախագահ Վլադիմիր Վարդանյանը ողջունեց այս փոփոխությունները: Նրա խոսքով` փոփոխություններն ուղղված են նրան, որ ունենանք ՔԿՀ, որտեղ պատիժը դիտարկվելու է որպես հիմնական պատժամիջոց, այլ ոչ թե անձին նվաստացնելու միջոց:

Վարդանյանը հայտարարեց, որ առաջիկայում քննարկում կլինի նախագծի վերաբերյալ բոլոր շահագրգիռ կողմերի մասնակցությամբ, որ հնարավորության դեպքում առաջինից երկրորդ ընթերցման ընթացքում բարելավումներ լինեն:

Այն առաջին ընթերցմամբ ընդունվեց: