Ջո Բայդենը չի բացառում Կիմ Չեն Ընի հետ հանդիպումը
ԱՄՆ նախագահ Ջո Բայդենը հնարավոր է համարել Հյուսիսային Կորեայի առաջնորդի հետ հանդիպումը։ Սեուլում, պատասխանելով լրագրողի համապատասխան հարցին, Բայդենը նշել է, որ դա կախված կլինի նրանից, թե որքանով է Կիմ Չեն Ընը «անկեղծ և լուրջ»։
«Հիմնական նպատակը նախկինի պես հանդիսանում է Կորեական թերակղզու ամբողջական ապամիջուկայնացումը»,- մայիսի 21-ին Սեուլում Հարավային Կորեայի նորընտիր նախագահ Յուն Սոկ Յոլի հետ համատեղ մամուլի ասուլիսի ժամանակ հայտարարել է Ջո Բայդենը։
Ամերիկյան առաջնորդը Հարավային Կորեա է ժամանել ասիական քառօրյա շրջագայության շրջանակներում։ Ընդ որում, նախագահի պաշտոնում սա Բայդենի առաջին ասիական շրջագայությունն է։ Ասիա այցը, որը նպատակ ունի ամրապնդել տնտեսական ու անվտանգային կապերը տարածաշրջանային դաշնակիցների հետ, տեղի է ունենում Կորեական թերակղզում որոշակի լարվածության ֆոնին։ Այցից մի քանի շաբաթ առաջ ԱՄՆ-ն և Հարավային Կորեան զգուշացրել էին, որ Հյուսիսային Կորեան կարող է ցանկացած պահի միջուկային փորձարկում անցկացնել։ Վաշինգտոնի տվյալներով՝ դա կարող է լինել նույնիսկ տարածաշրջան Բայդենի ացի ժամանակ։
Սեուլում տեղի ունեցած հանդիպումից հետո Ջո Բայդենը և Յուն Սոկ Յոլը հայտարարել էին, որ դիտարկում են համատեղ զորավարժությունների ընդլայնման հարցը։ «Մենք նաև քննարկել ենք, թե արդյոք մեզ անհրաժեշտ են միջուկային հարձակման դեպքում համատեղ զորավարժությունների անցկացումը»,- նշել է Յուն Սոկ Յոլը։
ԱՄՆ նախագահ Ջո Բայդենը այսօր՝ մայիսի 22-ին, կմեկնի Ճապոնիա։ Տոկիոյում Սպիտակ տան առաջնորդը կհանդիպի Ճապոնիայի, Ավստրալիայի և Հնդկաստանի առաջնորդների հետ։
Lուսանկարը՝ Associated Press գործակալության
Մեկնաբանել