HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արմեն Միրզոյան

Փաշինյանն ու Ալիևը Բրյուսելում ինչ են քննարկել . Շառլ Միշելի հայտարարությունը

Երեկ՝ մայիսի 22-ի երեկոյան, Բրյուսելում կայացել էր Եվրոպական խորհրդի նախագահ Շառլ Միշելի հանդիպումը Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ։ Հանդիպումից հետո Շառլ Միշելը հայտարարություն է տարածել, որտեղ ամփոփել է եռակողմ հանդիպման արդյունքները։

«Այսօր ես կրկին հյուրընկալել էի Ադրբեջանի նախագահ Ալիևին և Հայաստանի վարչապետ Փաշինյանին։ Այս ձևաչափով սա մեր երրորդ քննարկումն էր։ Մենք կենտրոնացել էինք Հարավային Կովկասում առկա իրավիճակի և երկու երկրների, ինչպես նաեւ տարածաշրջանի հետ ԵՄ հարաբերությունների զարգացման վրա», - նշվում է հայտարարության մեջ։

Շառլ Միշելի խոսքով՝ քննարկումն անկեղծ էր և արդյունավետ։ Կողմերը դիտարկել են հարցերի ողջ շրջանակը։

«Մանրամասն քննարկեցինք մարդասիրական խնդիրները, ներառյալ՝ ականազերծման, պահվող անձանց ազատ արձակելու ջանքերը ու անհետ կորածների ճակատագրերը»,- ասվում է հայտարարության մեջ։

Շառլ Միշելը մի քանի ոլորտներ է առանձնացրել, որտեղ կողմերը որոշակի պայմանավորվածությունների են հանգել:

Սահմանային խնդիրներ

«Սահմանային հարցով համատեղ հանձնաժողովների առաջին հանդիպումը կկայանա առաջիկա օրերին միջպետական սահմանին։ Այն կքննարկի սահմանի սահմանազատմանը վերաբերող բոլոր հարցերը և ինչպես լավագույնս ապահովել կայուն իրավիճակ»,- ընդգծել է Միշելը։

Կապ

«Առաջնորդները պայմանավորվել են տրանսպորտային հաղորդակցությունների ապաշրջափակման շուրջ։ Նրանք պայմանավորվել են, թե ինչ սկզբունքներով է իրականացվելու տարանցումը` Արևմտյան Ադրբեջանի և Նախիջևանի միջև, ինչպես նաև Ադրբեջանի տարածքով Հայաստանի տարբեր հատվածներ, նաև, թե ինչ սկզբունքով են իրականացվելու միջազգային փոխադրումները երկու երկրի հաղորդակցության ուղիների և ենթակառուցվածքների միջոցով: Հատկանշական է, որ նրանք համաձայնել են սահմանային վարչարարության, անվտանգության սկզբունքների, տարանցման տուրքերի, ինչպես նաև միջազգային բեռնափոխադրումների համատեքստում մաքսային ընթացակարգերի շուրջ։ Փոխվարչապետները առաջիկա օրերին կզբաղվեն այս աշխատանքով»,- նշվում է Եվրոպական խորհրդի նախագահի տարածած հայտարարության մեջ։

Խաղաղության պայմանագիր

«Առաջնորդները պայմանավորվել են շարունակել Հայաստանի և Ադրբեջանի միջև միջպետական հարաբերությունները կարգավորող խաղաղության ապագա պայմանագրի քննարկումը։ Արտաքին գործերի նախարարների գլխավորած խմբերը առաջիկա շաբաթներին կշարունակեն այս գործընթացը։ Ի հավելումն այս ուղեգծի՝ ես նաև ընդգծել եմ, որ անհրաժեշտ է ապահովել Ղարաբաղում էթնիկ հայ բնակչության իրավունքներն ու անվտանգությունը»,- ընդգծել է Շառլ Միշելը։

Սոցիալ-տնտեսական զարգացում

«Եվրոպական միությունը երկու կողմերի հետ կշարունակի Տնտեսական խորհրդատվական խմբի աշխատանքը, որը ձգտում է զարգացնել տնտեսական զարգացումը` ի շահ երկու երկրների և նրանց բնակչության: Ես նաև շեշտեցի բնակչությանը երկարաժամկետ կայուն խաղաղության նախապատրաստելու կարևորությունը։ ԵՄ-ն պատրաստ է ուժեղացնել իր աջակցությունը: Մենք պայմանավորվեցինք սերտ կապի մեջ մնալ և նորից հանդիպել նույն ձևաչափով մինչև հուլիս/օգոստոս»,- եզրափակել է Եվրոպական խորհրդի նախագահ Շառլ Միշելը։

Լուսանկարը՝ ՀՀ կառավարության մամուլի ծառայության

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter