HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

Հաշմանդամություն ձեռք բերած պատերազմի մասնակիցների առաջին խումբը կմեկնի Երուսաղեմ

Արցախյան երկրորդ պատերազմի հետևանքով հաշմանդամություն ձեռք բերած զինծառայողների առաջին խումբը մայիսի 27-ին խորհրդարանականների ուղեկցությամբ կմեկնի Երուսաղեմ: Խորհրդարանում հրավիրված քննարկմանն այս մասին ասաց ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը:

Նրա խոսքով՝ «Զինվորի տուն» վերականգնողական կենտրոնի և Երուսաղեմի Հայոց Պատրիարքության հետ համատեղ քննարկումների արդյունքում մշակվել է բարեգործական ծրագիր, որի շրջանակում որոշվել է, որ հաշմանդամություն ձեռք բերած պատերազմի մասնակիցները պատգամավորների ուղեկցությամբ որոշակի պարբերականությամբ կմեկնեն Երուսաղեմ՝ ծանոթանալու Պատրիարքության պատմությանն ու գործունեությանը, ինչպես նաև կայցելեն սրբավայրեր:

Առաջին խմբին ուղեկցելու են ԱԺ առողջապահության հարցերի մշտական հանձնաժողովի նախագահ Նարեկ Զեյնալյանը և փոխնախագահ Լուսինե Բադալյանը:

Անդրանիկ Քոչարյանը հայտարարեց, որ առաջին խմբի հետ չի կարող մեկնել, քանի որ այդ օրերին լինելու է Վիլնյուսում՝ ՆԱՏՕ-ի խորհրդարանական վեհաժողովի գարնանային նստաշրջանի աշխատանքներին մասնակցելու նպատակով: Երկրորդ խմբին կուղեկցեն Անդրանիկ Քոչարյանն ու Արփինե Դավոյանը:

«Սա իր բնույթով ուխտագնացություն է, եկեղեցին ձեր օրը կհարստացնի, կմասնակցեք շատ միջոցառումների»,- ասաց Քոչարյանը:

Նա անդրադարձավ նաև այն քննարկումներին, թե ինչու են պատգամավորներն ուղեկցում վիրավոր զինծառայողներին: Նրա խոսքով՝ գնում են, որովհետև պատասխանատու են ամբողջ խմբի համար:

Նարեկ Զեյնալյանը հույս հայտնեց, որ ուխտագնացությունը բավական հետաքրքիր կանցնի, և տղաները դրական լիցքերով Հայաստան կվերադառնան:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter