Մինչ գյուղատնտեսները գոհունակությամբ նշում էին, որ այս տարի ցրտահարության վտանգն արդեն իսպառ հետևում է, ու արդեն կարելի է ասել՝ ծիրանի լավ բերք ենք ունենալու, գյուղացիներն արդեն ահազանգում են մեկ այլ խնդրի մասին: Արմավիրի ու Վայոց ձորի մի շարք գյուղերի ծիրանի այգիներում գլուխ են բարձրացրել սնկային հիվանդություններ, ինչի հետևանքով ծիրանի բերքը թափվում է:

Այս խնդրից տեղյակ է նաև գյուղատնտեսության ոլորտի փորձագետ Գագիկ Մանուչարյանը: «Հայացք»-ի հետ զրույցում նա ասաց, որ սնկային հիվանդությունները կարող են լրջորեն, գրեթե ամբողջությամբ վնասել բերքը, եթե գյուղացիները ժամանակին անհրաժեշտ միջոցներ չձեռնարկեն: Ավելին՝ այս հիվանդությունը պտղից անցնում է նաև տերևներին ու ճյուղերին, վնասում ծառը:

Մասնագետը խորհուրդ է տալիս գյուղացիներին՝ հենց այս օրերին ծառերը սրսկել ծծումբ պարունակող ցանկացած պրեպարատով՝ առավոտյան կամ երեկոյան, սակայն ցանկալի է՝ ոչ անձրևից առաջ, քանի որ անձրևը կմաքրի դեղը:

Սնկային հիվանդությունների տարածման համար այս եղանակը խիստ բարենպաստ է՝ տաքությունն ու խոնավությունը նպաստում են դրան: Բարեբախտաբար, Գագիկ Մանուչարյանի խոսքով' սնկային հիվանդությունների տարածումը հանրապետությունում համատարած չէ ու այլ ծառատեսակների շրջանում չի արձանագրվել:

Փորձագետին իր սեփական դիտարկումները թույլ են տալիս այս տարվա համար կանխատեսել ծիրանի բավականին լավ բերք ու առանձնապես ոչ բարձր գին, եթե կարկտահարության նոր դեպքեր չլինեն:

«Հիմարություն են այն հայտարարությունները, թե ծիրանն այս տարի թանկ է լինելու»,- ասաց Մանուչարյանը: