Հուլիսի 1-ից ուժի մեջ կմտնի կանխիկ գործարքների սահմանափակման վերաբերյալ «Անկանխիկ գործառնությունների մասին» օրենքում կատարված փոփոխությունը, որի համաձայն՝ 300 հազ․ դրամից ավելի գործարքները պետք է իրականացվեն անկանխիկ եղանակով:

«Կանխիկի շրջանառության կրճատումը մեր բարեփոխումների կարևորագույն ուղղություններից է։ Հուլիսի 1-ից այլևս բնակարանների և ավտոմեքենաների առքուվաճառք կանխիկ դրամով հնարավոր չի լինելու իրականացնել։ Բոլոր գործարքները պետք է լինեն անկանխիկ»,- Կառավարության հունիսի 2-ի նիստի մեկնարկին նշեց վարչապետ Նիկոլ Փաշինյանը։

Չնայած հարցը չզեկուցվող էր, սակայն Կառավարությունն այն քննարկեց, ապա քվեարկությամբ հաստատեց որոշման նախագիծը։ Կառավարության օրենսդրական նախաձեռնությունը անհետաձգելի է համարվել։ Այն կքննարկվի նաև Ազգային ժողովում:

Փաշինյանի խոսքով՝ օրենքում նաև դրույթ է լինելու՝ եթե կանխիկ վճարումով տեղի ունենա գործարք, դա կարող է հետագայում գործարքն առոչինչ ճանաչելու հիմք դառնալ։

«Մենք ասում ենք, որ արգելվում է 300 հազար դրամից ավելի գործարքի դեպքում այն իրականացնել կանխիկ, բայց, օրինակ, սուպերմարկետում մեկ ժամվա մեջ նույն մարդը 10 անգամ 300 հազար դրամանոց գործարք կարող է անել: Իհարկե, հասկանում ենք, որ այստեղ որոշակի տեխնիկական հարցեր կան, որ պետք է կարգավորենք, բայց պետք է գնանք այս ուղղությամբ»,- եզրափակեց վարչապետը: