Արցախի պետական նախարար Արտակ Բեգլարյանը ֆեյսբուքյան իր էջում գրել է, որ երեկ Մարտունու շրջանի Հաղորտի գյուղում տոն էր ու պատմական օր, քանի որ մեկնարկ տրվեց «Մունք» տեխնոդպրոցի աշխատանքներին:

«Այս խորհրդանշական անուն կրող դպրոցը բավականին լավ մոդել է ոչ միայն տեխնոլոգիական, այլ նաև համայնքային ու ազգային կրթության և զարգացման ծրագրերի համար, որտեղ տրվող գիտելիքներն ու հմտությունները նպատակ ունեն նպաստել անձի, համայնքի ու պետության կայուն զարգացմանն ու զորացմանը: Դպրոցի կերտման ու կայացման հիմքում կրկին նախաձեռնող, ստեղծարար ու սրտացավ մարդիկ են, տվյալ դեպքում՝ «Ես» կրթական հիմնադրամի տնօրեն ու տեխնոդպրոցի հիմնադիր Աշոտ Ավետիսյանի և Հաղորտի համայնքի ղեկավար Նվեր Մարտիրոսյանի գլխավորությամբ, ովքեր թիմային ոգով ու ազգային նպատակներով մեկնարկել են այս գործը և դեռ շատ մեծ հաջողություններ կարձանագրեն, իսկ նրանց շուրջ արդեն պայծառ պատանիների մի խումբ է հավաքվել:

Ուրախ եմ, որ Արցախի կառավարությունը այս ծրագրի գլխավոր աջակիցներից է՝ reArmenia հարթակի, Ավրորա մարդասիրական նախաձեռնությունների և հարյուրավոր մեծ ու փոքր աջակից կազմակերպությունների ու անձանց հետ միասին»,- գրել է նա։