![](/static/articles/14/59/49/l-Q9vTayLFeJ.jpg)
Հաստատվել է «Հայաստան» համահայկական հիմնադրամի 2021թ տարեկան հաշվետվությունը
Այսօր` հունիսի 25–ին, տեղի է ունեցել «Հայաստան» համահայկական հիմնադրամի հոգաբարձուների խորհրդի 31-րդ նիստը, որը վարել է Հանրապետության նախագահ, «Հայաստան» համահայկական հիմնադրամի հոգաբարձուների խորհրդի նախագահ Վահագն Խաչատուրյանը:
Ինչպես տեղեկացնում է հիմնադրամի մամուլի ծառայությունը, նիստին մասնակցում էին հոգաբարձուների խորհրդի 22 անդամները, որից 4-ը՝ հեռավար:
Նիստը մեկնարկել է Գերաշնորհ Տեր Հովնան եպիսկոպոս Հակոբյանի օրհնությունից հետո:
Վահագն Խաչատուրյանը հանդես գալով բացման խոսքով ասել է.
«Այս տարի մեր հանդիպման առիթը կրկնակի տոնական է՝ լրանում է «Հայաստան» համահայկական հիմնադրամի 30-ամյակը: «Հայաստան» համահայկական հիմնադրամն իրավամբ համահայկական այն կառույցն է, որը գուցե չունի նմանօրինակը: Այս պատճառով է, որ յուրաքանչյուրիս և մասնավորապես հոգաբարձուների խորհրդի անդամների ամենօրյա աշխատանքը պետք է միտված լինի Հիմնադրամի հանրահռչակմանը, նրա վարկանիշն ու առաքելությունն անբասիր պահելուն»:
Համաձայն օրակարգի՝ նիստի ընթացքում տեղի է ունեցել «Հայաստան» համահայկական հիմնադրամի 2021 թվականին գործունեության մասին գործադիր տնօրեն Հայկակ Արշամյանի տարեկան հաշվետվության լսումը, որի ընթացքում ներկայացվել են Արցախի և Հայաստանի մի շարք համայնքների առողջապահական, սոցիալական, կրթական, բնակարանաշինության, ենթակառուցվածքների զարգացմանն ուղղված լայնածավալ ծրագրերը:
Հաստատվել է «Հայաստան» համահայկական հիմնադրամի 2021թ տարեկան ֆինանսական և 2021թ. գործունեության տարեկան հաշվետվությունը:
Քննարկվել է Հիմնադրամի նոր խմբագրությամբ կանոնադրության նախագիծը, որոշվել է լրամշակելու նպատակով ստանալ և ամփոփել առաջարկությունները և նախագիծը ներկայացնել խորհրդի հաստատմանը առաջիկա նիստի ընթացքում։ Նաև քննարկվել են Հիմնադրամի հետագա անելիքները:
«Հոգաբարձուների խորհրդի 31-րդ նիստն անցավ կառուցողական մթնոլորտում: Եղան բազմաթիվ հարցադրումներ, որոնց տրվեցին հստակ և սպառիչ պատասխաններ, բոլոր որոշումներն ընդունվեցին միաձայն»,–նշեց Հիմնադրամի գործադիր տնօրեն Հայկակ Արշամյանը նիստի ավարտից հետո:
Մեկնաբանել