HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

Աննա Վարդապետյանն ընտրվեց գլխավոր դատախազի պաշտոնում

Խորհրդարանը վարչապետի օգնական, արդարադատության նախկին փոխնախարար Աննա Վարդապետյանին ընտրեց գլխավոր դատախազի պաշտոնում:

Ազգային ժողովի Հաշվիչ հանձնախմբի նախագահ Նարեկ Բաբայանը ներկայացրեց փակ գաղտնի քվեարկության արդյունքները, ըստ որի՝ քվեարկությանը մասնակցել է 70 պատգամավոր, այդքանն էլ կողմ է քվեարկել Վարդապետյանի թեկնածությանը:

Նիստին և քվեարկությանը մասնակցել է միայն իշխող «Քաղաքացիական պայմանագիր» խմբակցությունը, ընդդիմությունը շարունակում է բոյկոտը:

ԱԺ նախագահ Ալեն Սիմոնյանը շնորհավորեց Աննա Վարդապետյանին և հիշեցրեց, որ վերջինս իր լիազորությունները ստանձնելու է այս տարվա սեպտեմբերի 15-ին` գործող դատախազ Արթուր Դավթյանի լիազորությունների դադարեցման օրը: Վարդապետյանն այդ օրը երդվելու է խորհրդարանում:

Աննա Վարդապետյանն իր ելույթում ընդգծել էր, որ արդարադատությունը մշտապես իր ուշադրության կենտրոնում է եղել ու այդպես էլ շարունակվելու է` անկախ իր զբաղեցրած դիրքից: Նա նաև կարևորել էր հովանավորչության բացառումը։

«Ես հասկանում եմ՝ շատ դժվար է մերժել փոքր հասարակության մեջ, որտեղ քեզ բոլորը ճանաչում են, դու ճանաչում ես բոլորին, շատ դժվար է դեմ գնալ այն կարծրատիպային մոտեցումներին, որ կա։ Կոռուպցիան չի դրսևորվում միայն կաշառքով, կաշառքն էլ չի դրսևորվում միայն թղթադրամն իրար փոխանցելով։ Կոռուպցիան դրսևորվում է նաև հովանավորչությամբ, ու եթե հովանավորչությանը նպաստող պայմանները չհաղթահարվեն, դա լուրջ մարտահրավեր է օրենքի գերակայությանը, ինչն էլ իր հերթին քայքայելու է ժողովրդավարության հիմքերը»,- ասել էր նա:

36-ամյա Աննա Վարդապետյանը մինչ այժմ դատախազությունում աշխատանքի փորձ չունի: Իր ելույթում Վարդապետյանն անդրադարձավ նաև այն քննադատություններին, որ երբևէ չաշխատելով այդ համակարգում՝ հավակնում է դառնալ հանրապետության գլխավոր դատախազը:

«Ինձ մեղադրում են, որ ես չեմ աշխատել դատախազության համակարգում, բայց ես կարծում եմ, որ սա հնարավորություն է ինձ՝ այլ տեսանկյունից հարցին նայելու։ Յուրաքանչյուր գործ, որի վերաբերյալ մասնագիտական քննարկում է տեղի ունենում, ես նայում եմ մարդու տեսանկյունից, ու ինձ համար իմ ամբողջ աշխատանքի ընթացքում կարևոր է լինելու, թե մենք արդյոք պաշտպանու՞մ ենք մարդու իրավունքները»,- նշել էր Աննա Վարդապետյանը։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter