Կառավարությունը 1 մլրդ 385 մլն դրամ կհատկացնի 18 բնակավայրերում 24 սուբվենցիոն ծրագրերի իրականացման համար։ Որոշումն ընդունվեց գործադիրի հունիսի 30-ի նիստում։

Տարածքային կառավարման և ենթակառուցվածքների նախարար Գնել Սանոսյանը տեղեկացրեց, որ ծրագրերից 22-ն ավարտված են, 2-ը դեռ ընթացքի մեջ են։

«Եթե այսօրվա որոշումն էլ ընդունենք, կստացվի, որ այս 6 ամսվա ընթացքում 273 ծրագրի համար արդեն հատկացրել ենք 7 մլրդ 307 մլն դրամ, և շինարարություններն ավարտվել են»,- ասաց Սանոսյանը՝ ներկայացնելով ըստ մարզերի ծրագրերի բաշխվածությունը․

• Արագածոտնի մարզ՝ 3 ծրագիր, 58 մլն դրամ, 
• Արարատի մարզ՝ 3 ծրագիր, 89 մլն դրամ, 
• Արմավիրի մարզ՝ 2 ծրագիր 10 մլն դրամ, 
• Գեղարքունիքի մարզ՝ 5 ծրագիր 353 մլն դրամ, 
• Կոտայքի մարզ՝ 2 ծրագիր, 34 մլն դրամ, 
• Լոռու մարզ՝ 4 ծրագիր, 84 մլն դրամ,
• Վայոց ձորի մարզ՝ 1 ծրագիր, 76 մլն դրամ,
• Սյունիքի մարզ՝ 3 ծրագիր, 653 մլն դրամ,
• Տավուշի մարզ՝ 1 ծրագիր, 24 մլն դրամ։

ՏԿԵ նախարարը նաև հիշեցրեց, որ 2023 թ .-ի համար նախարարությունը սկսել է հայտեր ընդունել մարզպետարաններից, համայնքները մինչև հուլիսի 10-ը հայտերը կտան մարզպետարաններին, որոնք էլ դրանք կփոխանցեն նախարարությանը մինչև 15-ը։ 

Վարչապետ Նիկոլ Փաշինյանն էլ հետաքրքրվեց, թե ինչպե՞ս է ընթանում 2022 թ.-ի ծրագրերի իրականացումը։

«461 հայտից 361-ն արդեն քննարկել ենք, ուղարկել համայնքներին։ Կլինեն հայտեր, որոնք նախագծողների չհասցնելու պատճառով ուշանում են, եթե դանդաղի, 2023-ի մեջ կընդգրկենք»,- ասաց նախարարը։

Փաշինյանն էլ ընդգծեց՝ հունիսի 30-ն է, բայց կան սուբվենցիոն հայտեր, որ կառավարությունով չեն անցել։

«Իսկ այդ հայտերի մի մասը կարելի էր ապրիլին սկսել և այս տարի ավարտել։ Այդ ծրագրերի մեծ մասն այս տարի հաստատ չի ավարտվի»,- նշեց վարչապետը՝ ասելով, որ հաջորդ տարվա համար նման դեպքերը պետք է բացառել։

«Շինարարության սեզոնը սկսեց, կաբինետներում անելու գործ պետք է չմնա, գործը պետք է լինի շինհրապարակներում»,- եզրափակեց Փաշինյանը։