Ուկրաինայում պատերազմի 132-րդ օրվա առավոտյան ամփոփումն սկսենք վերջին ժամերի հիմնական նորություններով։

• ՌԴ ԱԴԾ-ն նախազգուշացրել է Ռուսաստանի քաղաքացիներից մեկին՝ ուկրաինական բարեգործական հիմնադրամին նվիրաբերություն անելու համար։ Գերատեսչությունում նախազգուշացրել են, որ դա կարող են գնահատել որպես պետական դավաճանություն։
• Շվեյցարիայում կայացել է Ուկրաինայի հետպատերազմական վերականգնման միջազգային համաժողովը։ Այն գնահատվել է 750 միլիարդ դոլար։ Ընդ որում, Շվեյցարիայի նախագահն Ուկրաինային խնդրել է լուծել կոռուպցիայի հարցը։
• Լիսիչանսկում, ռուսական զորքերի գրավումից հետո, մնացել է մոտ 10 000 բնակիչ։ Այդ մասին հայտարարել է Լուգանսկի մարզային վարչակազմի ղեկավար Սերգեյ Գայդայը։ Նրա խոսքով՝ մինչև պատերազմը քաղաքում ապրում էր մոտ 100 000 մարդ։ 
• Վլադիմիր Պուտինը Ռուսաստանի հերոսի կոչում է շնորհել գեներալ-մայոր Էսեդուլա Աբաչևին և գեներալ-գնդապետ Ալեքսանդր Լապինին։ Նրանք Լուգանսկի մարզի ուղղությամբ հարձակման հրամանատարներն էին։
• Ինքնահռչակ Դոնեցկի ժողովրդական հանրապետության իշխանությունները հայտնում են Դոնեցկի երկաթուղային կայարանի շրջանում հարվածների մասին, որի հետևանքով զոհվել է 3 և վիրավորվել 31 խաղաղ բնակիչ։

Ճապոնիան նոր պատժամիջոցներ է սահմանել Ռուսաստանի դեմ

Սև ցուցակում հայտնվել է 57 ֆիզիկական անց և ռուսական 6 ընկերություն, այդ թվում ՌԴ փոխվարչապետ Դմիտրի Գրիգորենկոն, Միացյալ ավիաշինական կորպորացիայի ղեկավար Յուրի Սլյուսարը, «Росгеология»-ի ղեկավար Սերգեյ Գորկովը, օլիգարխ Գոդ Նիսանովը, թավջութակահար Սերգեյ Ռոլդուգինը և «Северсталь»-ի տնօրենների խորհրդի նախագահ Ալեքսեյ Մորդաշովի բարեկամները։

Ցանկում հայտնվել են նաև Ուկրաինայի Խերսոնի և Զապորոժյեի մարզերի «նոր իշխանությունների» հինգ ներկայացուցիչներ։ Բացի այդ, արտահանման սահմանափակումներ են ներդրվել ռուսական 65 և բելառուսական 25 ընկերությունների նկատմամբ, որոնք գործում են ավիաշինական և նավաշինական ոլորտներում։ Արգելք է դրվել նաև ռուսական ոսկու ներկրման վրա։

Ընդհանուր առմամբ, Ճապոնիայի պատժամիջոցների տակ է հայտնվել Ռուսաստանի, Բելառուսի, Լուգանսկի ու Դոնեցկի ինքնահռչակ հանրապետությունների մոտ 800 քաղաքացիներ, ինչպես նաև մոտ 300 ռուսական ընկերություն և կազմակերպություն։

Volvo Group-ը կրճատում է Ռուսաստանում իր աշխատակիցների թիվը

Коммерсант-ի տվյալներով՝ Կալուգայում գտնվող ընկերության գործարանը, որն արտադրում է բեռնատարներ, Ուկրաինա Ռուսաստանի ներխուժումից և պատժամիջոցների սահմանումից հետո, կանգնած է։ Ընկերությունը չի դիտարկում ռուսական շուկայից ամբողջությամբ դուրս գալու տարբերակը։ 

«Volvo Group-ը որոշում է կայացրել ադապտացնել իր գործառնական գործունեությունը՝ կապված ՌԴ-ում փոփոխված շուկայական պայմանների հետ: Ադապտացումը կնշանակի այս տարվա ընթացքում Ռուսաստանում Volvo Group-ի ստորաբաժանումներում անձնակազմի կրճատում»,- ռուսական թերթին հայտնել են ընկերության ներկայացուցիչները։

Կուրսի մարզի նահանգապետը հայտնել է սահմանամերձ գյուղերում հրետանային հարվածների մասին

«Հարվածներ են գրանցվել Մարկովո գյուղում, կրկին արկերը թռչում են Տետկինո գյուղում»,- հայտնել է Ռոման Ստարովոյտը։

Պաշտոնյայի խոսքով՝ պատահարների հետևանքով տուժածներ չկան, սակայն առավոտյան արկակոծումները դեռևս շարունակվում են։

Պոպովո-Լեժաչի գյուղում վնասվել է մի քանի տուն։ Տետկինոյում և Պոպովո-Լեժաչիում անջատվել է նաև էլեկտրականությունը։

Բրյանսկի նահանգապետը ևս հայտարարել է Ուկրաինայի կողմից հարվածների մասին

Ալեքսանդր Բոգոմազի տվյալներով՝ հուլիսի 5-ի առավոտյան Զերնովո գյուղի ուղղությամբ գրանցվել է հրետանային 18 հարված։ Տուժածների մասին չի նշվում։

IKEA-ն սկսել է Ռուսաստանում իր ապրանքների եզրափակիչ առցանց վաճառքը։ Հուլիսի 5-ի կեսգիշերից հետո ընկերության կայքի աշխատանքը խիստ ծանրաբեռնվել է և խափանվել։

Պատերազմի ուսումնասիրման ամերիկյան ինստիտուտն Ուկրաինայում առկա իրավիճակի մասին

• Ռուսական ղեկավարությունը կարող է օպերատիվ դադարի պահանջներ դնել՝ Լիսիչանսկի գրավումից և Լուգանսկի մարզի վարչական սահմաններ դուրս գալուց հետո։
• Ռուսական ուժերն ամրապնդում են Սևերոդոնեցկի և Լիսիչանսկի նկատմամբ տարածքային և վարչական վերահսկողությունը։
• Ռուսական զորքերը շարունակել են Բախմուտից արևելք հարձակողական գործողությունները՝ Բախմուտի և Սևերսկի ուղղությամբ հարձակումների նախապատրաստման համար։
• Ռուսական զորքերը շարունակել են Խարկովից հյուսիս սահմանափակ և անհաջող հարձակումները։
• Ուկրաինական պարտիզանների ակտիվությունն ուղղված է Մելիտոպոլի և Տոկմակի շուրջ երկաթուղային ուղիներին։
• Ռուսական ղեկավարությունը Ուկրաինայի քաղաքացիների շրջանում, որոնք բնակվում են բռնազավթված տարածքներում, կարող է զորահավաքի պայման դնել։

Ռոսավիացիան մինչև հուլիսի 12-ը երկարաձգել է Ռուսաստանի հարավային և կենտրոնական օդանավակայաններ թռիչքները

Ժամանակավորապես դադարեցվել են թռիչքները դեպի Անապայի, Բելգորոդի, Բրյանսկի, Վորոնեժի, Գելենջիկի, Կրասնոդարի, Կուրսկի, Լիպեցկի, Դոնի Ռոստովի, Սիմֆերոպոլի և Էլիստայի օդանավակայաններ։ 

Արգելքը դրվել է Ուկրաինա Ռուսաստանի ներխուժման առաջին օրը և պարբերաբար երկարաձգվում է։

Լուսանկարը՝ ukranews.com-ից