Խորհրդարանը երկրորդ ընթերցմամբ և ամբողջությամբ ընդունեց «Պաշտպանության մասին» օրենքում փոփոխություններ կատարելու նախագիծը, որով ամբողջովին փոխվում են պաշտպանության ոլոտում կառավարության լիազորությունները: Փոփոխությունների համաձայն` պաշտպանության նախարարի առաջին տեղակալն ի պաշտոնե կհանդիսանա զինված ուժերի գլխավոր շտաբի պետը, բայց չի կարող փոխարինել նախարարին:

Ըստ պաշտպանության նախարար Սուրեն Պապիկյանի` այս փոփոխություններով կառավարությունը նպատակ ունի բարելավել զինված ուժերի ղեկավարման ուղղահայացի համակարգը և բարձրացնել ղեկավարման արդյունավետությունը:

Պաշտպանության նախարարին վարչապետի որոշմամբ կարող է փոխարինել նախարարի քաղաքական տեղակալներից մեկը:

Անվտանգության խորհրդի կողմից ընդունվող մի շարք պլաններ և ծրագրեր ներառվում են պաշտպանության պլանում՝ որպես Սահմանադրությամբ սահմանված պաշտպանության ոլորտի հիմնական ուղղությունները ներառող մեկ միասնական փաստաթուղթ:

Ընդդիմությունը չի մասնակցել այս նախագծի քննարկմանը: