Թուրքիայի, Ռուսաստանի, Ուկրաինայի և ՄԱԿ-ի պատվիրակությունների բանակցությունների ժամանակ պայմանավորվածություն է ձեռքբերվել ուկրաինական հացահատկի արտահանման համակարգող կենտրոնի ստեղծման մասին։ Այդ մասին թուրքական Anadolu գործակալության փոխանցմամբ բանակցություններից հետո հայտարարել է Թուրքիայի պաշտպանության նախարար Հուլուսի Աքարը։ 

Աքարի խոսքով՝ պայմանավորվածություն է ձեռք բերվել նաև հիմնական տեխնիկական հարցերի շուրջ, ինչպիսիք են մեկնման և նշանակման կետերում համատեղ հսկողությունը ու փոխադրման երթուղիներում նավագնացության անվտանգության ապահովումը:

Թուրք նախարարի փոխանցմամբ՝ Ուկրաինայի և Ռուսաստանի ներկայացուցիչները հաջորդ շաբաթ ևս մեկ հանդիպում կունենան Թուրքիայում, որտեղ, ինչպես սպասվում է, մեկ անգամ ևս կքննարկվեն բոլոր մանրամասները և փաստաթղթեր կստորագրեն։

ՌԴ պաշտպանության նախարարության պաշտոնական ներկայացուցիչ Իգոր Կոնաշենկովն ավելի վաղ հայտարարել էր, որ Ստամբուլում բանակցությունների ժամանակ ռուսական պատվիրակությունը դիտարկման է ներկայացրել Ուկրաինայից հացահատկի արտահանման վերականգնման հարցի «արագ պրակտիկ որոշման» առաջարկների փաթեթ։ Թե ինչ առաջարկների մասին է խոսքը, նա չի մանրամասնել։ Ուկրաինայի արտաքին գործերի նախարար Դմիտրի Կուլեբան, մինչև բանակցությունների մեկնարկը, ասել էր, որ երկրները գտնվում են «երկու քայլի վրա»՝ ուկրաինական հացահատկի արտահանման համաձայնագրին հասնելու ուղղությամբ։

Լուսանկարը՝ Anadolu գործակալության