2022 թվականի առաջին հինգ ամիսներին՝ հունվար-մայիսին, Հայաստանը աշխարհի տարբեր երկրներից մոտ 51 մլն դոլարի մարդասիրական օգնություն է ստացել։ Ինչպես տեղեկանում ենք Վիճակագրական կոմիտեից (ՀՀ ՎԿ), 2021 թվականի նույն ժամանակաշրջանի համեմատ այն աճել է 2.8 անգամ։

Ստացված մարդասիրական օգնության առյուծի բաժինը քիմիայի և դրա հետ կապված արդյունաբերության ճյուղերի արտադրանք է։ Իսկ ավելի պարզ՝ խոսքը մեծապես դեղամիջոցների մասին է։ Ընդհանուր առմամբ՝ այս ապրանքախմբի ներքո 2022 թվականի առաջին հինգ ամիսներին Հայաստան ներմուծված օգնության ծավալը կազմել է 45.2  մլն դոլար, որը կազմում է ստացված ամբողջ օգնության 89%-ը։

Նախորդ տարվա նույն ամիսների համեմատ «քիմիայի և դրա հետ կապված արդյունաբերության ճյուղերի արտադրանք» տողով ստացված օգնության ծավալն աճել է 4 անգամ, որով էլ պայմանավորված  է ամբողջ օգնության ծավալի աճը։ 

Հայաստանը որպես մարդասիրական օգնություն ստանում է նաև ոչ մեծ ծավալի  մեքենաներ, սարքավորումներ և մեխանիզմներ,  մանածագործական իրեր, տարբեր արդյունաբերական և այլ ապրանքներ, որոնց կշիռը միասին վերցրած կազմում է ընդհանուր ստացված օգնության 11%-ը։ 

Ստացված օգնության 57.5%-ը՝ ԵՄ երկրներից է, 31.2%-ը՝ ԱՄՆ-ից

Այս տարվա առաջին հինգ ամիսներին Հայաստանին տրամադրված մոտ 51  մլն դոլարի մարդասիրական օգնության 57.5%-ը Եվրամիության երկրներից է։ Այստեղ առավել մեծ ու էական կշիռ ունի Իսպանիան՝ 28.2%-ով։

ԱՊՀ երկրներից Հայաստանը էական ծավալի մարդասիրական օգնություն չի ստանում։ ԱՊՀ երկրների կշիռը կազմել է ընդամենը 0.6%:

Այլ երկրներից ստացվել է  օգնության 41.9%-ը։ Այս շարքում մեծ է ԱՄՆ-ի տեսակարար կշիռը՝ 31%:  Քիչ թե շատ տեսանելի կշիռ ունի Շվեյցարիան՝ 4.2%, Չինաստանը՝ 2.6%: