ԱՄՆ պետքարտուղար Էնթոնի Բլինքենը թվիթերյան գրառում է արել Թբիլիսիում Հայաստանի արտաքին գործերի նախարար Արարատ Միրզոյանի և Ադրբեջանի արտաքին գործերի նախարար Ջեյհուն Բայրամովի երկկողմ առաջին հանդիպման վերաբերյալ։

Բլինքենը, մասնավորապես, նշել է, որ Արարատ Միրզոյանը և Ջեյհուն Բայրամովը, հանդիպելով Թբիլիսիում, «դրական քայլ են արել»։

.@bayramov_jeyhun and @AraratMirzoyan took a positive step today, meeting in Tbilisi. Direct dialogue is the surest path to resolving Azerbaijani and Armenian differences.

— Secretary Antony Blinken (@SecBlinken) July 16, 2022

«Ջեյհուն Բայրամովը և Արարատ Միրզոյանն այսօր դրական քայլ են արել՝ հանդիպելով Թբիլիսիում։ Ուղիղ երկխոսությունը ամենահուսալի միջոցն է Ադրբեջանի և Հայաստանի միջև տարաձայնությունների լուծման համար»,- գրել է ԱՄՆ պետքարտուղարը։

Հիշեցնենք, որ նախօրեին Թբիլիսիում կայացել էր Հայաստանի և Ադրբեջանի ԱԳ նախարարների հանդիպումը՝ վրացական կողմի միջնորդությամբ։ ՀՀ ԱԳՆ տարածած մամուլի հաղորդագրության համաձայն՝ հանդիպման ընթացքում Արարատ Միրզոյանն ու Ջեյհուն Բայրամովն անդրադարձել են Հայաստանի և Ադրբեջանի միջև հարաբերությունների կարգավորմանն առնչվող հարցերի լայն շրջանակի։ Կողմերը քննարկել են այս առումով նախկինում ստանձնած պարտավորությունների կատարման ընթացքը և մտքեր փոխանակել հետագա հնարավոր քայլերի շուրջ։

«Նախարար Միրզոյանը վերահաստատել է հայկական կողմի տեսակետն առ այն, որ տարածաշրջանում կայուն և տևական խաղաղության հասնելու ճանապարհին կարևոր է Լեռնային Ղարաբաղի հակամարտության քաղաքական կարգավորումը, և այս համատեքստում ընդգծել է ԵԱՀԿ Մինսկի խմբի համանախագահության ինստիտուտի և փորձի օգտագործման կարևորությունը՝ իր միջազգային մանդատին համապատասխան»,- նշվում է ԱԳՆ հաղորդագրության մեջ։ 

Բացի այդ, ՀՀ արտաքին գործերի նախարարը շեշտել է հումանիտար խնդիրների, այդ թվում` հայ ռազմագերիների ազատ արձակման ու հայրենադարձման և անհետ կորած անձանց ճակատագրերի պարզաբանման խնդիրների հասցեագրման կարևորությունը։

Լուսանկարը՝ ՀՀ ԱԳՆ մամուլի ծառայության