Արմավիրի մարզի Մեծամորի համայնքապետարանի շենքի դիմաց այսօր ծիրանի փառատոն էր: Խոշորացված համայնքում նման միջոցառում առաջին անգամ էր տեղի ունենում: 30 գյուղական բնակավայր ծիրանի բերքն ու ծիրանից պատրաստված մթերքները ներկայացնում էին 15 տաղավարներում:

Թեև գյուղացիներն այս տարի դժգոհ էին ծիրանի բերքից, քանի որ գարնան ցրտահարությունը վնասներ էր պատճառել, այնուամենայնիվ ներկայացել էին փառատոնին:

Տաղավարային հյուրասիրությունից բացի, համայնքի մեջ ներառված տարբեր բնակավայրերում գործող երգի, պարի խմբակները զուգահեռ ելույթներ էին ունենում:

Միջոցառմանը մասնակցում էր նաև Արմավիրի մարզպետ Էդվարդ Հովհաննիսյանը, մարզպետի տեղակալը ու մարզի համայնքապետեր:

«Բոլորդ ծիրանի օղի՞ եք հյուրասիրում»,- տաղավարներին մոտենալով՝ կատակեց մարզպետը՝ չհրաժարվելով հյուրասիրությունից: 

Տեղում հայտարարեցին, որ նմանատիպ միջոցառումները պարբերաբար կրկնվելու են, ինչը համայնքի բնակիչներին համախմբելու, առողջ մրցակցություն սերմանելու խորհուրդ ունի: