Իրանի տիեզերական գործակալությունը հերքել է Ռուսաստանի կողմից «Խայամ» հետախուզական արբանյակի հնարավոր կիրառումն Ուկրաինայի նկատմամբ լրտեսության համար։ Deutsche Welle-ի փոխանցմամբ՝ օգոստոսի 7-ին հրապարակված գործակալության հայտարարության մեջ նշվում է, որ տիեզերական ապարատը ենթարկվում է միայն Թեհրանին և կիրառելի չէ մյուս երկրների ռազմական նպատակների համար։

Իրանական կողմի պնդմամբ՝ արբանյակի աշխատանքի կառավարման կենտրոնը գտնվում է Իրանի տարածքում և բոլոր խմբերը, որոնք կապված են դրա վերահսկողության և շահագործման հետ, առաջին օրից և դրա արձակումից անմիջապես հետ իրականացվում են իրանցի մասնագետների կողմից։ «Որևէ այլ երկիր հասանելիություն չի ունենա տեղեկատվությանը։ Մեկ այլ երկրի կողմից ռազմական նպատակներով արբանյակային լուսանկարների կիրառման շշուկները չեն համապատասխանում իրականությանը»,- նշել է գործակալությունը։ 

Ռուսաստանը օգոստոսի 9-ին Բայկոնուրից ուղեծիր է պատրաստվում հանել իրանական արբանյակը։ Ինչպես ավելի վաղ գրել էր The Washington Post-ը, հղում անելով արևմտյան հետախուզական ծառայություններին, այն պետք է էականորեն ընդլայնի Թեհրանի հնարավորությունները՝ Մերձավոր Արևելքում ռազմական օբյեկտների նկատմամբ լրտեսության ուղղությամբ։ Սակայն, ինչպես գրում է պարբերականը, դրանից առաջ Մոսկվան մտադիր էր օգտագործել տիեզերական ապարատը՝ ուկրաինական զինված ուժերի նկատմամբ հսկողության համար։ 

Լուսանկարը՝ Associated Press գործակալության