«Շոու-բիզնեսմենները կարծում են, որ ամեն ինչ գիտեն ու նոր գիտելիքներ ստանալու կարիք չունեն»
«Բամբիռ» ռոք-խումբը ստեղծվել է 1978 թվականին Գյումրի քաղաքում: Խմբի անդամներն էին Գագիկ «Ջագ» Բարսեղյանը, Գուրգեն Հակոբջանյանը, Արմեն Սարգսյանը, Վլադիմիր Ոսկանյանը և Թաթուլ Եղիազարյանը: 1992-ին հավաքվում է խմբի նոր սերունդը` Նարեկ Բարս (վոկալ, կիթառ), Արիկ Գրիգորյան (վոկալ, ֆլեյտա), Արման Քոչարյան (բաս-կիթառ), և Աշոտ Կորգանյան (հարվածային գործիքներ): 2004-ին Բամբիրը ներկայացրեց «Սալաօ» ռոք-օպերան` ըստ Էռնեստ Հեմինգուեյի «Ծերունին և ծովը» պատմվածքի: 2007-ին Աշոտը լքում է խումբը, և թմբկահարի տեղը խմբում զբաղեցնում է Վարդան Փարեմուզյանը: 2010 թվականին խումբը մասնակցում է “Eurovoice” միջազգային մրցույթին "That's fine with us" երգով, և զբաղեցնում երրորդ տեղը: Այսօրվա մեր զրուցակիցն է Արիկ Գրիգորյանը:
Դուք հիմա որտե՞ղ եք գտնվում, հյուրախաղերում ե՞ք: Ի՞նչ ծրագրի շրջանակներում:
Մենք հիմա գտնվում ենք Իռլանդիայում` խմբի աշխատանքային շրջանակներում (ծիծաղում է): Ֆեյսբուքում կարող եք ավելի մանրամասնություններ իմանալ: Արդեն մի քանի ամիս է, ինչ այստեղ ենք, ծանրաբեռված ծրագրերով տարբեր խմբերի հետ հանդես ենք գալիս ակումբներում, հյուր ենք եղել տեղական հեռուստատաալիքներից մեկում և այլն:
Որտեղի՞ց ծագեց “Armenian scotch”-ի գաղափարը: Մի քիչ պատմեք այս ալբոմի պատմությունը:
“Armenian sctotch” ալբոմը նվիրված է Ռոբերտ Բըրնսի 250 և Հովհանես Թումանյանի 140 ամյակին: Գաղափարը Գագիկ Բարսեղյանինն է` Ջագին: Այն ձայնագրվել է Հայաստանում, իսկ ԱՄՆ-ում միքսինգ և մասթերինգ է արվել:
Ինչպե՞ս եք հանրությանը ձեր մասին տեղեկացնում:
Հանրությանը հիմնականում խմբի գործնեության մասին տեղեկացնում ենք ինտերնետի միջոցով: Եթե մտնեք Ֆեյսբուքի «Բամբիռի» էջը, ապա այնտեղ ձեզ հետաքրքրող ինֆորմացիան կգտնեք:
Հայկական շոու-բիզնեսը ինչպիսի՞նն է` ըստ ձեզ: Այն շա՞տ է կոռումպացված:
Դե կարող եմ ասել, որ ցածր մակարդակի վրա է գտնվում, երևի դրա համար էլ կոռումպացված է: Բայց հուսով եմ, որ մնացած բաների հետ մեկտեղ կզարգանա: Ինֆորմացիայի պակաս այդ ուղղությամբ չկա, համացանցում կարելի է շոու-բիզնեսի վերաբերյալ համապատասխան գրականություն գտնել: Ուղղակի այդ շոու-բիզնեսմենները կարծում են, որ ամեն ինչ գիտեն ու նոր գիտելիքներ ստանալու կարիք չունեն (ծիծաղում է):
Դուք հաճախ եք ձեր ստեղծագործություններում օգտագործում հայտնի գրողների ստեղծագործությունների մոտիվները…
Միշտ էլ կարելի է օգտվել գրականությունից (ծիծաղում է), ինչու չէ, միշտ հաճելի է ընկերություն անել, օրինակ, Մարկեսի, Շեքսպիրի, Ջեյմս Ջոյսի, Ռումիի և շատերի հետ:
Մեկնաբանել