Երրորդ հայցադիմումը՝ Իշխան Սաղաթելյանին վարչական պատասխանատվության ենթարկելու մասին
Երևանի քաղաքապետ Հրաչյա Սարգսյանն այս տարվա ընթացքում արդեն երրորդ անգամ է հայցադիմում վարչական դատարան՝ ԱԺ ընդդիմադիր պատգամավոր, «Հայաստան» խմբակցության անդամ Իշխան Սաղաթելյանին վարչական պատասխանատվության ենթարկեելու պահանջով: Երեք հայցադիմումներով էլ պահանջը նույնն է. «Վարչական իրավախախտումների վերաբերյալ ՀՀ օրենսգրքի 180.1-ին հոդվածի 1-ին մասով նախատեսված վարչական իրավախախտում կատարելու համար Ի. Սաղաթելյանին վարչական պատասխանատվության ենթարկելու մասին»:
Վարչական իրավախախտումների վերաբերյալ ՀՀ օրենսգրքի 180.1-ին հոդվածի 1-ին մասը վարչական պատասխանատվություն է նախատեսում այն անձանց նկատմամբ, ովքեր առանց համայնքի ղեկավարին օրենքով սահմանված կարգով իրազեկելու կամ իրազեկման պայմանների խախտմամբ հավաք են անցկացրել: Երևանի քաղաքապետը հենց այս կարգը խախտելու համար է ցանկանում Իշխան Սաղաթելյանին վարչական պատասխանատվության ենթարկել:
Նշենք, որ պատասխանատվության միջոցը տուգանք է, որը նշանակվում է հավաքի կազմակերպչի կամ ղեկավարի նկատմամբ` 100-300 հազար դրամի չափով:
Իշխան Սաղաթելյանի դեմ առաջին հայցադիմումը վարչական դատարան մուտքագրվել է հուլիսի 15-ին և ընդունվել է վարույթ: Երկրորդ հայցադիմումը մուտքագրվել է օգոստոսի 16-ին, իսկ երրորդը՝ օգոստոսի 18-ին: Նման գործերով վարչական դատարանը որոշում է կայացնում անձին վարչական պատասխանատվության ենթարկելու կամ հայցադիմումը մերժելու մասին:
Նշենք, որ «Դիմադրություն» շարժումը համակարգում էր Իշխան Սաղաթելյանը և վերջինիս մասնակցությամբ շարունակական հանրահավաքներ են կազմակերպվել Երևան քաղաքում՝ պահանջելով վարչապետ Նիկոլ Փաշինյանի հրաժարականը:
Մեկնաբանել