Կարինե Աճեմյանը կարծում է, որ այսօր որոշ բաներ կփոխվեն
Քիչ առաջ ԲՀԿ առաջնորդ Գագիկ Ծառուկյանը հայտարարություն տարածեց, թե ««Բարգավաճ Հայաստան» կուսակցությունը նպատակահարմար չի գտնում մասնակցել կոալիցիոն կառավարության ձևավորմանը»: Այս հայտարարությունը հետաքրքիր էր նաեւ այն առումով, որ այսօր երեկոյան ՀՀԿ-ն գործադիր մարմնի նիստ է գումարելու եւ հստակեցնելու է իր անելիքները: Եթե Գագիկ Ծառուկյանի հայտարարությունը նախապես համաձայնեցված չէր Սերժ Սարգսյանի հետ, ապա այսօր երեկոյան հնարավոր է ՀՀԿ-ի գործադիր մարմնում շատ անկանխատեսելի որոշումներ կայացվեն:
ՀՀԿ-ական պատգամավոր Կարինե Աճեմյանը «Հետքի» հետ զրույցում ասաց, թե այսօր գործադիր մարմնի նիստում, իր կարծիով, Գագիկ Ծառուկյանի հայտարարությունից հետո որոշակի բաներ կփոխվեն:
«Քաղաքական գործընթաց է, եւ ըստ այդմ մենք էլ մեր անելիքը պիտի հստակեցնենք»,-ասաց Կարինե Աճեմյանը:
ՀՀԿ-ական պատգամավորը նաեւ համամիտ չէ այն կարծիքին, թե ԲՀԿ-ի կոալիցիա չմտնելուց հետո ՀՀԿ-ն մենիշխանություն է ունենալու: «Մենք դեռ չենք որոշել, թե ում հետ ենք համագործակցելու, թեեւ ըստ երեւույթին որոշ ուժերի հետ կհամագործակցենք: Հետո գիտեք, մեզ տրված քվեներով այդ իրավունքն ունենք, դա մենիշխանություն չի: Պարզապես ցանկալի կլիներ, որ որոշ ուժերի հետ համագործակցենք: Կարծում եմ մեր որոշումները նպաստավոր կլինեն, թե կուսակցության, թե ժողովրդի համար»,-ավելացրեց Կարինե Աճեմյանը:
Մեկնաբանություններ (1)
Մեկնաբանել