Հայաստանի վարչապետ Նիկոլ Փաշինյանը Վլադիվոստոսկում կայանալիք Արևելյան տնտեսական համաժողովի շրջանակներում Ռուսաստանի նախագահ Վլադիմիր Պուտինի հետ կքննարկի Լեռնային Ղարաբաղում հակամարտության կարգավորումը։ Այդ մասին, TACC գործակալության փոխանցմամբ, լրագրողներին հայտարարել է ՌԴ նախագահի օգնական Յուրի Ուշակովը։

«Նախատեսվում է Լեռնային Ղարաբաղի կարգավորման թեմայով քննարկում։ Ռուսաստանը շարունակում է համապարփակ գործակցությունը Հայաստանի և Ադրբեջանի հարաբերությունների կարգավորման գործընթացում՝ առաջնորդների եռակողմ պայմանավորվածությունների հիման վրա: <...> Ռուսական խաղաղապահ անձնակազմը տարածաշրջանում ապահովում է անվտանգությունը»,- ասել է Ուշակովը։

Նրա պնդմամբ՝ կողմերը կքննարկեն նաև հայ-ռուսական հարաբերությունների հիմնական ասպեկտները՝ ներառյալ առևտրատնտեսական համագործակցությունն ընդլայնելու հեռանկարները։ «Զարգանում է փոխգործակցությունը նաև էներգետիկ հատվածում։ Ռուսաստանից գազի մատակարարումները տարեկան ավելի քան 2,4 միլիարդ խորանարդ մետր են»,- ասել է Կրեմլի ներկայացուցիչը։

Հիշեցնենք, որ սեպտեմբերի 7-ին Վլադիվոստոկում տեղի կունենա «Բազմաբևեռ աշխարհի ճանապարհին» թեմայով Արևելյան տնտեսական 7-րդ համաժողովի լիագումար նստաշրջանը: Ինչպես ավելի վաղ հայտարարել էր Կրեմլը, միջոցառմանը կմասնակցեն Ռուսաստանի նախագահ Վլադիմիր Պուտինը, այլ պետությունների ներկայացուցիչներ, այդ թվում՝ ՀՀ վարչապետ Նիկոլ Փաշինյանը։