![](/static/articles/14/81/86/l-CZrY4GzsVf.jpg)
Գեղարքունիքի և Վայոց ձորի մարզպետարանները քաղաքացիական բնակչության վնասների վերաբերյալ տեղեկություններ չունեն
Սեպտեմբերի 13-ին՝ կեսգիշերին Ադրբեջանի կողմից Հայաստանի մի շարք բնակավայրերի հրետակոծության հետևանքով տուժել են խաղաղ բնակիչներ: Այս պահի դրությամբ, մարդկային կորուստներ չկան, սակայն բնակիչները նյութական վնասներ են կրել:
Ադրբեջանը հարձակվել է երեք ուղղությամբ՝ Գեղարքունիքի, Սյունիքի և Վայոց ձորի մարզերում տեղայակված դիրքերի և բնակավայրերի:
Սյունիքի մարզպետի օգնական Արմինե Ավագյանը «Հետք»-ին ասաց, որ իրենց տեղեկություններով՝ մարզում խաղաղ բնակչության շրջանում զոհեր և վիրավորներ չկան, սակայն մարդիկ կրել են նյութական վնասներ, որոնց վերաբերյալ դեռ ամբողջական ուսումնասիրություն չի կատարվել:
Արմինե Ավագյանի փոխանցմամբ՝ Տեղ համայնքի Քարաշեն գյուղում վնասվել է մշակույթի տան շենքը, Վաղատուր գյուղում արկն ընկել է այգիների մեջ: Գորիս համայնքի Վերիշեն և Ակներ գյուղերում արկն ընկել է բնակելի տների վրա:
«Այս պահի դրությամբ այդ տվյալները գիտենք: Մեր տվյալներով՝ խաղաղ բնակիչության շրջանում զոհեր և վիրավորներ չկան»,-ասում է մարզպետի օգնականը:
Գեղարքունիքի մարզպետարանի տեղեկատվության և հասարակայնության հետ կապերի բաժնի պետ Հասմիկ Շահբազյանն ասաց, որ դեռ հստակ տեղեկություններ չկան, թե խաղաղ բնակիչներն ինչ վնասներ են կրել: Ըստ նրա՝ «մարզպետարանն ուսումնասիրում է»:
Թեև մարզպետարանը նոր-նոր ուսումնասիրություն է իրականացնում, սակայն սոցիալական ցանցերում վաղ առավոտից արդեն Վարդենիս համայնքի Սոթքի վարչական շենքի և հարևան գյուղերի վնասված բնակելի տների լուսանկարներն են հրապարակվել:
Վայոց ձորի մարզպետարանից տեղեկատվություն ստանալ հաջողվեց միայն ընդմիջումից հետո: Այս խառն իրավիճակում աշխատակիցները որոշել էին դուրս գալ աշխատասենյակներից և գնալ ընդմիջման:
Մարզպետի խորհրդական Արմեն Դավթյանն ասաց, որ դեռ տվյալներ չունեն խաղաղ բնակչության շրջանում վնասների, կորուստների վերաբերյալ:
Առողջապահության նախարարության հաղորդմամբ, Ադրբեջանի զինված ստորաբաժանումների կողմից հայկական դիրքերի և բնակավայրերի ուղղությամբ հրետակոծության հետևանքով վիրավորում է ստացել քաղաքացիական երեք անձ: Նրանցից մեկի առողջական վիճակը գնահատվում է ծանր, երկուսինը` բավարար:
Մեկնաբանել