Եվրախորհրդարանում Հարավային Կովկասի հետ հարաբերությունների հարցերով պատվիրակության ղեկավար, Էստոնիայի արտաքին գործերի նախկին նախարար Մարինա Կալյուրանդը հասցեական հայտարարություն է արել Հայաստանի ինքնիշխան տարածքի նկատմամբ Ադրբեջանի իրականացրած ոտնձգությունների վերաբերյալ։ Նա այդ հայտարարությունը տարածել է թվիթերյան իր միկրոբլոգում։

I strongly condem last night's large-scale military attack by Azerbaijan against multiple targets in the territory of the Republic of Armenia.
I call on the international community, in particular the EU 🇪🇺, to meet this unacceptable use of force with an unequivocal response. pic.twitter.com/tCStuMTZIC

— Marina Kaljurand MEP (@MarinaKaljurand) September 13, 2022

«Խստորեն դատապարտում եմ երեկ գիշեր Ադրբեջանի նախաձեռնած լայնամասշտաբ ռազմական հարձակումը Հայաստանի Հանրապետության տարածքի բազմաթիվ թիրախների վրա։ Արձանագրվել է ինտենսիվ հրետակոծություն և ԱԹՍ-ներով հարձակումներ, որոնք թիրախավորել են Հայաստանի Սյունիքի, Վայոց ձորի և Գեղարքունիքի մարզերը ու պատճառ դարձել անհայտ թվով զոհերի»,- գրել է եվրոպացի պատգամավորը։

Նրա պնդմամբ՝ այս նոր ագրեսիան Բաքվի՝ մարտ և օգոստոս ամիսներին Լեռնային Ղարաբաղի շփման գծի հրադադարի լուրջ խախտումների շարունակությունն է։ Եվրոպացի պատգամավորն այն կարծիքին է, որ Բաքուն օգտվել է համաշխարհային և տարածաշրջանային իրավիճակից, ինչը պայմանավորված է Ուկրաինայի դեմ Ռուսաստանի ագրեսիայով։

«Ես կոչ եմ անում միջազգային հանրությանը, և, մասնավորապես, Եվրոպական Միությանը՝ արձագանքել այս անթույլատրելի ուժի կիրառմանը պարզորոշ պատասխանով։ Այժմ անատամ հայտարարությունների ժամանակը չէ՝ զսպվածության կոչ անելու «երկու կողմերին»։ Դեռ երկու շաբաթ առաջ Ադրբեջանը և Հայաստանը Բրյուսելում համաձայնեցին մեկ ամսվա ընթացքում սկսել խաղաղության համաձայնագրի շուրջ աշխատանքները։ Ես Բաքվին հորդորում եմ բաց չթողնել այս պատմական հնարավորությունը և առանց հապաղելու վերադառնալ բանակցային սեղանին»,- հայտարարել է Մարինա Կալյուրանդը։