Թիվ 30 ընտրատարածքից մեծամասնական ընտրակարգով պատգամավոր ընտրված անկուսակցական Էդմոն Մարուքյանը որևէ կուսակցության չի անդամակցելու, բայց համագործակցությամբ փորձելու է կյանքի կոչել իր ծրագրերը: «Հետքը» փորձեց պատգամավորից պարզել, թե կոնկրետ ինչ սկզբունքով է նա իրականացնելու այդ համագործակցությունը:

-Պարո’ն Մարուքյան, հինգերորդ գումարման խորհրդարանն արդեն կազմավորված է և շուտով կսկսի աշխատանքը: Լինելով անկախ, անկուսակցական պատգամավոր`ինքներդ ինչպե՞ս եք կազմակերպելու Ձեր աշխատանքը քաղաքական խմբակցությունների կողքին:

-Հինգերորդ գումարման ԱԺ-ում ներկայացված են բոլոր քաղաքական ուժերը. այս առումով իմ կարծիքով ունենք բազմազան Ազգային ժողով, և հետաքրքիր է լինելու, որովհետև տարբեր ուժեր իրենց քաղաքական օրակարգն ունեն, և բանավեճերի արդյունքում ունենալու ենք հետաքրիր քննարկումներ, իսկ հետաքրքիր քննարկումներն իմ կարծիքով բերելու են հետաքրքիր օրենսդրական լուծումների: Ինչ վերաբերում է իմ աշխատանքին, ես միշտ նշել եմ, որ համագործակցելու եմ ԱԺ-ում ներկայացված բոլոր ուժերի հետ: Քանի որ արդեն հստակ է` ԱԺ ընտրություններից հետո մեծամասնություն է կազմել Հանրապետական կուսակցությունը, հետևաբար` Հանրապետական խմբակցությունն ամենամեծ խմբակցությունն է լինելու ԱԺ-ում, կարծում եմ` իմ ծրագրերն իրագործելու համար, քաղաքացիական հասարակության օրակարգն առաջ մղելու համար պետք է համագործակցեմ Հանրապետական խմբակցության հետ, որպեսզի կարողանամ անցկացնել իմ նախագծերը:

-Չե՞ք կարծում, որ ՀՀԿ-ից և ԲՀԿ-ից բացի մյուս քաղաքական ուժերը, լինելով փոքրաթիվ, չեն կարող հաջողության հասնել առանձին նախաձեռնությունների և նախագծերի առումով:

-ԲՀԿ-ն հայտաարարել է, որ իրենք կոալիցիա չեն կազմում, բայց մնում են կառուցողական դաշտում: Հետագան ցույց կտա, թե դա ինչ է նշանակում` ընդդիմադիր ճանապարով կգնան, թե կմնան համագործակցության դաշտում: Ինչ վերաբերում է ընդդիմադիր մյուս ուժերին`ՀԱԿ-ին, Դաշնակցությանը, »Ժառանգությանը», ապա ԱԺ-ն մի տեղ է, որտեղ բոլոր ուժերը բանավեճերի, քննարկումներ և համագործակցության արդյունքում պետք է փորձեն իրենց ծրագրերը ներկայացնել և անցկացնել ԱԺ ընթացակարգերով: ԱԺ-ում ցանկացած օրենսդրական նախագիծ կարող է ընդունվել, եթե 66 պատգամավոր կողմ քվեարկի դրան: Այժմ քաղաքական իրադրությունը հետևյալն է. կա քաղաքական մեծամասնություն, որը կարող է որոշել ամեն ինչ ԱԺ-ում: Հանրապետական խմբակցությունն ունի 69 պատգամավոր, հետևաբար այս պահին միայն նրանք կարող են ցանկացած հարց ընդունել կամ ցանկացած հարցի ընդունումը մերժել: Մյուս բոլոր ուժերը, նաև ԲՀԿ-ն, եթե ուզում են իրենց ծրագրերն անցկացնել, պետք է անցկացնեն միայն քաղաքական մեծամասնության հետ համագործակցությամբ: Այլ տարբերակ ես չեմ տեսնում: Այսինքն՝ կամ պետք է համագործակցեն և դրա արդյունքում հասնեն փոխզիջումների, կամ մնան քննադատողի դերում:

-Եթե Ձեր նախաձեռնությունը հավանության արժանանա խորհրդարանում միայն մեկ փոքրաթիվ քաղաքական ուժի կողմից, ինչպե՞ս կվարվեք այդ դեպքում:

-Բնականաբար շարժվելու եմ իմ նախաձեռնության սկզբունքներից ելնելով: Աշխատելու եմ ներգրավել մյուս ուժերին, որ քաղաքական մեծամասնությունը, նույնպես հավանություն տա, որպեսզի այդ նախագիծն անցնի, այլ տարբերակ չկա: