Ոստիկանության հատուկ նշանակության գումարտակի ծառայողները երեկ՝ սեպտեմբերի 21-ի վաղ առավոտյան, ուժ կիրառելով, «Եռաբլուր» զինվորական պանթեոնից բերման են ենթարկել զոհված և անհետ կորած զինծառայողների ծնողների։

Ոստիկանության հայտարարության համաձայն՝ վերոնշյալ դեպքի առնչությամբ ոստիկանության պետ Վահե Ղազարյանի հանձնարարությամբ Ներքին անվտանգության վարչությունում ծառայողական քննություն է կատարվում։

Ավելի վաղ ոստիկանությունից հայտնել էին, որ ոստիկանապետի հանձնարարականով ուսումնասիրվում են զոհված և անհետ կորած զինծառայողների ծնողների՝ «Եռաբլուր» զինվորական պանթեոնից բերման ենթարկելու գործի հանգամանքները։

Դատախազությունը նույնպես ուսումնասիրում է ոստիկանության հատուկ նշանակության գումարտակի ծառայողների գործողությունները «Եռաբլուրում»: Այս մասին «Հետքի» հետ զրույցում ավելի վաղ հայտնել էր դատախազության հանրային կապերի բաժնի պետ Արևիկ Խաչատրյանը։