Ազգային ժողովում «Քաղաքացիական պայմանագիր» խմբակցության պատգամավորներից  ընդամենը երեքը հարց ուղղեցին Բարձրագույն դատական խորհրդի անդամի թեկնածու Երանուհի Թումանյանցին: 

Հիշեցնենք, որ Ազգային ժողովում պատգամավորների նախաձեռնությամբ արտահերթ նիստ է հրավիրվել` Բարձրագույն դատական խորհրդի (ԲԴԽ) երկու անդամ ընտրելու նպատակով: Ազգային ժողովի «Քաղաքացիական պայմանագիր» խմբակցությունը ԲԴԽ անդամի պաշտոնում առաջացած երկու թափուր տեղերի համար թեկնածուներ է առաջադրել արդարադատության նախարար Կարեն Անդրեասյանին (երեկ աշխատանքից ազատվելու դիմում է ներկայացրել) և արդարադատության նախարարի տեղակալ Երանուհի Թումանյանցին:

Պատգամավոր Զարուհի Հարությունյանին հետաքրքրում էր «հանրային շահի» բովանդակության օրենսդրական բացի հարցը: 

Պատգամավոր Կնյազ Հասանովն էլ հետաքրքրված էր դատավորների թվով և նշեց, որ դատական գործերը տարիներով քննվում են և մարդիկ կորցնում են իրենց հույսը:

Թեկնածու Թումանյանցը նշեց, որ արդարադատության նախարարությունում աշխատելու ժամանակահատվածում այս ուղղությամբ բավականին քայլեր ձեռնարկվել է, որոնցից են` մասնագիտացված դատարանների ստեղծումը, դատավորների թվի ավելացումը: Գործերի քննության ողջամիտ ժամկետի պահպանման ուղղությամբ ևս մի շարք պրոցեսներ են սկսվել և շուտով ավարտին կհասցվեն, որոնցից մեկը էլեկտրոնային արդարադատության ներդրումն է:

Նախապես հերթագրված պատգամավոր Հերիքնազ Տիգրանյանը հանել էր իր հարցը:

Երանուհի Թումանյանցը, ինչպես ԲԴԽ թեկնածու Կարեն Անդրեասյանը, եզրափակիչ ելույթով հանդես չեկավ:

Պատգամավորները ժամը 14:00-ից մինչև ժամը 15:00-ն փակ գաղտնի քվեարկությամբ ընտրելու են ԲԴԽ երկու անդամներին: