Մարտական խնդիրների իրականացման, պլանավորման կամ վերահսկման գործառույթներ ունեցող պաշտոններ զբաղեցնող պայմանագրային զինծառայողների համար կսահմանվի ատեստավորման նոր համակարգ, որի արդյունքներով պայմանավորված՝ զինծառայողները հավելավճար կստանան:

Կառավարությունը հոկտեմբերի 13-ի նիստում հավանություն տվեց այս նախագծին՝ այն համարելով անհետաձգելի:

«Այս նախագիծն, ըստ էության, պայմանագրային զինծառայողների աշխատավարձը կրկնապատկելու մասին է: Պետք է արձանագրենք, որ անցել ենք նույն ճանապարհով, ինչ ուսուցիչների դեպքում:

2019-ին բարձրացրինք ուսուցիչների աշխատավարձը, նաև՝ պայմանագրային զինծառայողներինը, ընդ որում՝ էական: Եթե ուսուցիչների դեպքում աշխատավարձի բարձրացումը 10 % էր, զինծառայողների դեպքում՝ շատ ավելի էական էր: Բայց միևնույն է՝ բովանդակային մասով արդյունավետության զգացողությունը չունեինք»,- նախագծի քննարկման ասաց վարչապետ Նիկոլ Փաշինյանը:

Ըստ Կառավարության ղեկավարի՝ օրենքի՝ ուժի մեջ մտնելուց հետո անմիջապես կսկսվի կամավոր ատեստավորման գործընթացը: Զինծառայողն ատեստավորում անցնելու դեպքում կստանա աշխատավարձի կրկնապատկում, երբեմն՝ նույնիսկ ավելին:

«Նախ մենք հայտարարել ենք՝ անցում ենք կատարում պրոֆեսիոնալ բանակի, սա բանակի բարեփոխումների հայեցակարգի կարևոր և անբաժանելի մասն է»,- նշեց վարչապետը:

Փաշինյանը հայտնեց՝ պրոֆեսիոնալ բանակի զինծառայողը պետք է չունենա բնակարանի, հացի, ընտանիքի անդամների առողջապահության կարիքների ապահովման և երեխաների ուսումը կազմակերպելու հետ կապված խնդիր։

«Այս 4 սյուների վրա է կառուցված լինելու պրոֆեսիոնալ բանակի մեր հայեցակարգը՝ սոցիալական երաշխիքների մասով»,- ասաց նա:

Պայմանագրային զինծառայողը առաջին ատեստավորումը չանցնելուց հետո հնարավորություն կունենա կրկնակի ատեստավորում անցնել, սակայն երկրորդի արդյունքներն ազդեցություն են ունենալու նաև պայմանագրային զինծառայողի կողմից տվյալ պաշտոնում հետագա պաշտոնավարման վրա:

Կառավարության օրենսդրական նախաձեռնությունը դեռ պետք է քննարկվի Ազգային ժողովում: