Հունիսի 13-ին Գյումրի քաղաքի «Պոլիտեխնիկում» ուսումնարանի պատի տակ հայտնաբերվել էր կիսաայրված տղամարդու դիակ՝  բռնի մահվան հետքերով, ինչի առթիվ Շիրակի մարզի քննչական բաժնում  հարուցվել էր քրեական գործ՝ «Դիտավորյալ սպանություն» հոդվածով:

Նախաքննության ընթացքում պարզվել է, որ հայտնաբերված դիակը հանդիսանում է Գյումրի քաղաքի  Բաշինջաղյան 10 տան բնակիչ Ս. Հակոբյանը, ում սպանության նախորդ օրը Գյումրի քաղաքի Սավոյան փողոցում ծեծի էին ենթարկել  Հ. Գեւորգյանը, Ա Բարիչենկովը, Գ. Գեւորգյանը, Ս. Թադեւոսյանը՝  Բարիչենկոյի կնոջը՝  Ա. Թադեւոսյանին, վիրավորելու եւ սեռական հարաբերություն ունենալու առաջարկություն անելու համար:

Հ. Գեւորգյանը, Ա Բարիչենկովը, Գ. Գեւորգյանը, Ս. Թադեւոսյանը բռունցքներով հարվածներ են հասցրել Ս. Հակոբյանի մարմնի տարբեր մասերին: Ա. Բարիչենկովի  բռունցքի հերթական  հարվածից  Ս. Հակոբյանը  վայր է ընկել, որից հետո Հ. Գեւորգյանը, Ա Բարիչենկովը, Գ. Գեւորգյանը, Ս. Թադեւոսյանը ոտքերով հարվածներ են հասցրել  տուժողի  կրծքավանդակին եւ մարմնի մյուս մասերին:

Դրանից հետո  Հ. Գեւորգյանը  դեպքի վայրից հեռացել է, իսկ Ա. Բարիչենկովը, Գ. Գեւորգյանը եւ  Ս. Թադեւոսյանը շարունակել են ոտքերով հարվածներ հասցնել Ս. Հակոբյանի մարմնի տարբեր մասերին, որի ընթացքում վերջինս կորցրել է գիտակցությունը:

Կարծելով, որ նա մահացել է՝  Ա. Բարիչենկովը  տնակից սավան է բերել  եւ   կապելով Ս. Հակոբյանի ձեռքերն ու ոտքերը՝   մարմինը տեղավորել են անկողնու ծածկոցի մեջ, տեղափոխել Գյումրի քաղաքի նախկին «Պոլիտեխնիկական ինստիտուտի» կիսաքանդ շենք ու հեռացել:

Մոտավորապես 5 ժամ անց  Ա. Բարիչենկովը  զանգահարել եւ կանչել է  Ս. Թադեւոսյանին, Գ. Գեւորգյանին եւ միասին Ս. Հակոբյանին տեղափոխել են Գյումրու «Պոլիտեխնիկում» ուսումնարանի պատի տակ  եւ հանցագործության հետքերը թաքցնելու նպատակով  Ա. Բարիչենկովի կողմից նախապես բերված հեղուկ վառելանյութը լցրել Ս. Հակոբյանի վրա ու այրել:

«Ձեռք բերված ապացույցների հիման վրա հունիսի 22-ին  Ա. Բարիչենկովին, Ս. Թադեւոսյանին եւ Գ. Գեւորգյանին  մեղադրանք է առաջադրվել  ՀՀ քրեական օրենսգրքի  104-րդ հոդվածի 2-րդ մասի 7-րդ կետով (սպանություն, որը կատարվել է մի խումբ անձանց կողմից), իսկ Հ. Գեւորգյանին՝ ՀՀ քրեական օրենսգրքի  113-րդ հոդվածի 2-րդ մասի 3-րդ կետով (դիտավորությամբ առողջությանը  միջին ծանության վնաս պատճառելը՝ մի խումբ անձանց կողմից):

Նրանց նկատմամբ որպես խափանման միջոց  ընտրվել է կալանավորումը»,- հաղորդում է գլխավոր դատախազության մամլո ծառայությունը: