Ադրբեջանի արտաքին գործերի նախարար Ջեյհուն Բայրամովը թվիթերյան գրառում է արել, որտեղ անդրադարձել է ՀՀ ԱԳ նախարար Արարատ Միրզոյանի հետ Վաշինգտոնում կայացած հանդիպմանը։

«Պետքարտուղար Էնթոնի Բլինքենի նախաձեռնությամբ Վաշինգտոնում հանդիպում եմ ունեցել Հայաստանի արտաքին գործերի նախարար Արարատ Միրզոյանի հետ։ Ես վերահաստատել եմ Ադրբեջանի հանձնառությունն ու պատրաստակամությունն Ադրբեջանի և Հայաստանի միջև խաղաղության պայմանագրի շուտափույթ ստորագրման համար և կոչ եմ արել զերծ մնալ այնպիսի գործողություններից, որոնք կարող են խարխլել գործընթացը»,- թվիթերյան իր միկրոբլոգում գրել է Ադրբեջանի արտաքին գործերի նախարարը։

At the initiative of @SecBlinken had a meeting with Armenian FM @AraratMirzoyan in #WashingtonDC. I reiterated #Azerbaijan’s commitment & readiness for the soonest conclusion of the 🇦🇿🇦🇲 #peace agreement, and urged to refrain from actions that would undermine the process. pic.twitter.com/xTyJ9q15FH

— Jeyhun Bayramov (@Bayramov_Jeyhun) November 8, 2022

Հիշեցնենք, որ նոյեմբերի 7֊ին Հայաստանի ԱԳ նախարար Արարատ Միրզոյանը և Ադրբեջանի ԱԳ նախարար Ջեյհուն Բայրամովը հանդիպում էին ունեցել ԱՄՆ մայրաքաղաք Վաշինգտոնում։ Նախարարները հյուրընկալվել էին Բլեր Հաուսում, որտեղ տեղի է ունեցել նաև համատեղ հանդիպում ԱՄՆ պետքարտուղար Էնթոնի Բլինքենի հետ։ 

ՀՀ ԱԳՆ հայտարարության համաձայն՝ արտգործնախարարները մտքեր էին փոխանակել հավանական խաղաղության պայմանագրի տարրերի վերաբերյալ և արձանագրել, որ առկա են մի շարք խնդիրներ, որոնք դեռևս հասցեագրման կարիք ունեն։ «Երկու կողմերը վերահաստատել են հոկտեմբերի 6-ին Պրահայում և հոկտեմբերի 31-ին Սոչիում տեղի ունեցած հանդիպումներում Հայաստանի և Ադրբեջանի ղեկավարների ստանձնած հանձնառությունները»,- ասվում էր հաղորդագրության մեջ։

Վերջին անգամ Արարատ Միրզոյանն ու Ջեյհուն Բայրամովը հանդիպել էին հոկտեմբերի 14-ին Աստանայում՝ ՌԴ ԱԳ նախարար Սերգեյ Լավրովի հետ եռակողմ հանդիպման ժամանակ։ Ըստ ՀՀ ԱԳՆ տարածած հաղորդագրության՝ կողմերը քննարկել էին եռակողմ հայտարարությունների կատարման ընթացքը, անդրադարձ կատարել սահմանազատման և սահմանային անվտանգության հարցերով հանձնաժողովների շրջանակներում տարածաշրջանում տնտեսական կապերի և տրանսպորտային ենթակառուցվածքների ապաշրջափակման ուղղությամբ տարվող աշխատանքներին։

Այս հանդիպման ժամանակ ակնկալվում է, որ կողմերը դարձյալ կքննարկեն հայ-ադրբեջանական հնարավոր խաղաղության պայմանագրի դրույթները։

Լուսանկարը՝ Բայրամովի թվիթերյան միկրոբլոգից