Ֆրանսիայի նախագահ Էմանուել Մակրոնը հեռախոսազրույց է ունեցել Ադրբեջանի նախագահ Իլհամ Ալիևի հետ, որտեղ իր պատրաստակամությունն է հայտնել Երևանի և Բաքվի միջև հարաբերությունների կարգավորման աջակցմանը։ Այդ մասին շաբաթ օրը՝ նոյեմբերի 12-ին, հայտարարել է Ելիսեյան պալատի մամուլի ծառայությունը։

«(Մակրոնը) հաստատել է Ֆրանսիայի ամբողջական պատրաստակամությունը աջակցել երկու երկրների միջև հարաբերությունների կարգավորման գործընթացին և աշխատել տարածաշրջանում քաղաքական որոշման շուրջ, որը հնարավորություն կտա խաղաղություն հաստատել»,- նշվում է հայտարարության մեջ։

Ֆրանսիայի առաջնորդը նաև ողջունել է հայ-ադրբեջանական սահմանին Եվրամիության քաղաքացիական դիտորդական առաքելության կայունացնող ազդեցությունը, որի տեղակայման մասին որոշումը ձեռք էր բերվել հոկտեմբերի 6-ին Պրահայում Էմանուել Մակրոնի, Եվրոպական խորհրդի նախագահ Շառլ Միշելի, Իլհամ Ալիևի և ՀՀ վարչապետ Նիկոլ Փաշինյանի քառակողմ հանդիպման ժամանակ։ 

Ելիսեյան պալատը նաև հայտարարել է, որ Էմանուել Մակրոնն ու Նիկոլ Փաշինյանը կհանդիպեն նոյեմբերի 19-ին Թունիսում՝ ֆրանսախոս երկրների գագաթնաժողովի շրջանակներում։ 

Ադրբեջանական կողմի տարածած հաղորդագրությունն իր շեշտադրումներով էականորեն տարբերվում է ֆրանսիական կողմի տարածած հաղորդագրությունից։ Ըստ այդ երկրի նախագահի մամուլի ծառայության տարածած հաղորդագրության՝ Ալիևը կարևորել է Բաքվի և Երևանի միջև հարաբերությունների կարգավորման գործընթացում Մակրոնի չեզոք և հավասարակշռված մոտեցումը։

«Նախագահ Իլհամ Ալիևն ընդգծել է Հայաստանի և Ադրբեջանի միջև հարաբերությունների կարգավորման գործընթացում չեզոք, անաչառ և բալանսավորված մոտեցման ցուցադրման կարևորությունը»,- ասված է հաղորդագրության մեջ։ 

Ըստ այդ հաղորդագրության՝ Ալիևը նաև նշել է, որ վերջին օրերին հայկական կողմի հայտարարությունները «հակասում են երկու երկրների միջև հարաբերությունների կարգավորմանն ու խաղաղ օրակարգին»։

Լուսանկարը՝ Ադրբեջանի նախագահի մամուլի ծառայության