![](/static/articles/15/04/00/l-wkWH1hKM0l.jpg)
ԲԴԽ-ն Դավիթ Բալայանին առաջարկել է զբաղեցնել վերաքննիչ դատարանի դատավորի պաշտոնը
Բարձրագույն դատական խորհուրդը որոշել է Երևան քաղաքի ընդհանուր իրավասության դատարանի դատավոր Դավիթ Բալայանին առաջարկել Վերաքննիչ քրեական դատարանի դատավորի պաշտոնի թափուր տեղում իր թեկնածությունը՝ Հանրապետության նախագահի նշանակմանը ներկայացնելու նպատակով:
Դավիթ Բալայանը դատավորի կարիերան սկսել է 2001թ-ից` զբաղեցնելով Գեղարքունիքի մարզի առաջին ատյանի դատարանի դատավորի պաշտոնը։ Այնուհետև տեղափոխվել է Երևան:
Նշենք, որ վերաքննիչ դատարանի դատավորներին նշանակում է Հանրապետության նախագահը` Բարձրագույն դատական խորհրդի առաջարկությամբ:
Նախագահը կարող է համապատասխան ակտը եռօրյա ժամկետում իր առարկություններով վերադարձնել առաջարկություն ներկայացնող կամ միջնորդությամբ դիմող մարմին: Եթե իրավասու մարմինը` այս դեպքում ԲԴԽ-ն, չի ընդունում այդ առարկությունը, ապա Նախագահը ստորագրում է համապատասխան ակտը կամ դիմում է Սահմանադրական դատարան: Եթե Հանրապետության նախագահը չի կատարում նշված պահանջները, ապա համապատասխան ակտն ուժի մեջ է մտնում իրավունքի ուժով:
Մեկնաբանել