Իսկ գյուղնախարարությունը մատը մատին չի տալիս

Տավուշում օրերս տեղացած ուժեղ կարկուտի և անձրևների հետևանքով մարզի գյուղատնտեսությունը մեծ վնաս է կրել, իսկ կառավարությունը ոչ մի հույս չի տալիս գյուղացիներին: Նույն սցենարը կրկնվում է գրեթե ամեն տարի, երբ բնական աղետների հասցրած վնասի պատճառով անօգնական մնացած գյուղացուն պետությունը ոչ մի փոխհատուցում չի տրամադրում:

Գյուղատնտեսության նախարարությունից «Հայացք»-ին տեղեկացրին, որ տուժած գյուղացիներին այս անգամ էլ փոխհատուցում չի տրվելու և որ հարցով զբաղվում է մարզպետարանը: Իսկ մարզպետարանի մասնագետներից բաղկացած հանձնաժողովները երեկվա դրությամբ դեռ շրջում էին գյուղ առ գյուղ և գնահատում վնասի չափը: Տավուշի մարզպետարանի գյուղվարչության պետ Ռազմիկ Մելիքջանյանը մեզ հետ զրույցում նշեց, որ անգամ նախնական թվեր չի կարող հնչեցնել, թե մարզի գյուղատնտեսությանը հասցված վնասը քանի տոկոս է կազմում:

Փոխարենն արդեն թվերով են խոսում տուժած գյուղերի գյուղապետները: «Բավականին մեծ վնաս են կրել կարտոֆիլի և ցորենի ցանքատարածությունները, մոտ 30-40% կկազմի վնասը»,- «Հայացք»-ին տեղեկացրեց Նորաշենի գյուղապետ Արթուր Սիմոնյանը:

Կարկուտի և տեղատարափ անձրևի հետևանքով մեծ վնասներ են կրել մարզի Այգեձոր, Չինարի, Նորաշեն, Արծվաբերդ, Տավուշ և Վերին Կարմիրաղբյուր գյուղերի գյուղատնտեսական նշանակության ցանքատարածքները:

Սահմանապահ Չինարիի գյուղապետ Սամվել Սաղոյանի խոսքով' վերջին օրերին տեղատարափ անձրևների պատճառով ոչ միայն գյուղատնտեսությունն է մեծ վնաս կրել, այլև գյուղամիջյան ճանապարհն է քանդվել: «15-20 տան նկուղ ջուր է լցվել: Բերքն էլ է ահագին տուժել, չնայած հարկերից ազատված ենք, բայց վնասը մեծ է»,- նշեց գյուղապետը:

Տավուշի գյուղապետ Արթուր Հովհաննիսյանն էլ տեղեկացրեց, որ վնասի գնահատման աշխատանքները դեռ ընթացքի մեջ են: Ըստ գյուղապետի' Տավուշ գյուղում մոտ 20 հա խաղողի այգի է տուժել, որից 7 հա-ն' 100%-ով: Տուժել է կարտոֆիլի բերքի 80%-ը, ցորենի արտերի 10-15%-ը: Գյուղացիները թունանյութերի պարտքեր ունեն Կոնյակի գործարանին և այս պայմաններում չեն կարողանալու վճարել դրանք:

Արթուր Հովհաննիսյանը պատրաստվում է դիմել գործարանի ղեկավարությանը' խնդրելով չեղյալ համարել գյուղացիների պարտքը: «Անցած տարի գործարանի ղեկավարությունը 6 մլն դրամ բուժանյութի պարտք ներեց: Այս տարի էլ միակ հույսը Կոնյակի գործարանն է, որ գոնե պայմանագրով գյուղացիներին հատկացված բուժանյութի պարտքը ների: Մենք, այսպես թե այնպես, այս տարի խաղող չենք ունենալու, գոնե պարտք էլ չունենանք»,- ասաց գյուղապետը' տեղեկացնելով, որ յուրաքանչյուր ընտանիք գործարանին պարտք է 150 հազար դրամ բուժանյութի գումար:

Նշենք, որ տուժած բոլոր գյուղերը սահմանամերձ ու սահմանապահ գյուղեր են: Մարզի նշված համայնքների հողատարածքները պաշտպանելու համար ոչ հակակարկտային կայաններ են կառուցվել, ոչ էլ կառավարությունը գյուղացուն աջակցելու քայլ է կատարում: Իսկ թե այս պայմաններում ինչպե՞ս պետք է գոյատևի սահմանամերձ գյուղի բնակիչն ամբողջ տարվա ընթացքում' անլուծելի հարց է մնում: