«Քաղաքացիական պայմանագիր» խմբակցության պատգամավոր Վահագն Ալեքսանյանը «Ազգային ժողովի հայտարարությունը Ադրբեջանի խորհրդարանի 2022թ. նոյեմբերի 8-ի հայտարարության կապակցությամբ» թեմայով հրավիրված արտահերթ նիստի ժամանակ հարց ուղղեց հիմնական զեկուցող պատգամավոր Անդրանիկ Թևանյանին: Պատգամավորին հետաքրքրում էր՝ ներկայացված նախագիծը քննարկվե՞լ է Արցախի խորհրդարանի կամ ղեկավար կազմի հետ:

Անդրանիկ Թևանյանն ասաց, որ բուն նախագիծը չի քննարկվել Արցախի խորհրդարանի հետ, սակայն հիմք են ընդունել Արցախի խորհրդարանի ընդունած բազմաթիվ հայտարարություններ, Հայաստանի օրենսդրությունը և այլն: Ինչպես նաև հիմք են ընդունել Արցախի ժողովրդի հավաքական տեսակետները, որն ըստ պատգամավորի, երևաց հոկտեմբերի 30-ին՝ Ստեփանակերտում բազմահազարանոց հավաքով:

Անդրանիկ Թևանյանն ասաց, որ հիմք են ընդունել նաև Ղարաբաղյան շարժման արժեքները, բոլոր այն մոտեցումները, որոնք վերաբերում են մեր անվտանգային համակարգերին:

«Բնականաբար մենք ակտիվ կապի մեջ ենք Ղարաբաղի խորհրդարանի ներկայացուցիչների հետ, նրանց տեսակետները մեզ հայտնի են, դրանք հնչեցվել են և մեր միջոցառումներին և իրենց միջոցառումների ժամանակ»,-ասաց Անդրանիկ Թևանյանը, հավելելով, որ տեղյակ է՝ Արցախում կողմ են այս նախագծին:

Վահագն Ալեքսանյանը նաև հետաքրքրվեց՝ արդյոք Հայաստանի անկախության հռչակագրից բխում է Արցախի անկախացումը, նշելով, թե այնտեղ խոսվում է Հայաստանի և Ղարաբաղի միավորման մասին:

«Իրականում սա տեսական հարց է, բայց նաև սկզբունքային հարց է: Ես ուզում եմ հասկանալ՝ դուք  առաջնորդվում եք Հայաստանի անկախության հռչակագրո՞վ, որտեղ կա Հայաստանի և Արցախի վերամիավորման գաղափար, թե՞ խոսում եք այն տեքստով, որ Արցախը Հանրապետություն է Հայաստանից անկախ»,- հարցրեց Վ. Ալեքսանյանը:

Իշխանական պատգամավորի հարցին պատասխանելով՝ Անդրանիկ Թևանյանը նշեց, որ միջազգային հարաբերություններում և պրակտիկայում բազմաթիվ են դեպքերը, երբ միավորման գործընթացը միջնորդավորված ձևով տեղի է ունենում անկախության գործընթացներից հետո: Հայաստանի  անկախության հռչակագիրը ֆիքսել է վերամիավորման գաղափարը, դա ռազմավարական նպատակ է, որին հասնելու ճանապարհը, մարտավարական առումով ընտրվել է Արցախի Հանրապետության ճանաչումը:

Թևանյանը նշեց, որ այստեղ հակասություն չկա:

Լուսանկարում՝ Վահագն Ալեքսանյանը