Նախարարը խոսել է թոշակների բարձրացման պատճառով նպաստներից զրկվելու մասին
Մի քանի հազար դրամով թոշակների բարձրացման պատճառով նպաստառու ընտանիքների մի մասը զրկվել է նպաստի գումարներից: Պատգամավոր Լիլիթ Ստեփանյանը կառավարության անդամների հետ հարցուպատասխանի ժամանակ հետաքրքրվեց՝ աշխատանքի և սոցիալական հարցերի նախարարությունում հարցը քննարկվե՞լ է, թե՝ ոչ, և որտե՞ղ են տեսնում լուծումը:
Նախարար Նարեկ Մկրտչյանն «այսպես կոչված խնդիր» որակեց՝ նպաստների համակարգից մարդկանց դուրս մնալը: Նախարարն ասաց, որ ընտանիքի անապահովությունը գնահատվում է ընտանիքի անդամների վարձատրությունից ստացած եկամուտներն ու պարբերական ստացված վճարները՝ կենսաթոշակ, 3-րդ և հաջորդ երեխայի ծննդի կապակցությամբ տրվող վճարը և այլն:
Նարեկ Մկրտչյանը նշեց, որ այդ եկամուտները բերում են փոփոխություններ անապահովության գնահատման միավորների մեջ:
«Այո՛, խնդիրը կա, քանի որ խոսք է գնում թոշակառու անապահով անձանց մասին: Բայց ինչպես դուք արդեն նշեցինք, սա առաջին անգամը չէ, որ խնդրին բախվում ենք, եթե սա դիտարկենք խնդիր»,- ասաց Նարեկ Մկրտչյանը:
Նախարարը նշեց, որ քննարկումներ են ունեցել, մի քանի լուծման տարբերակ կա, սակայն վերջնական լուծումը անապահովության գնահատման նոր կարգի ներդրումն է, որը նախատեսել են ունենալ 2023թ․ սեպտեմբերից: Ըստ Մկրտչյանի՝ սա ավելի թիրախային կլինի և աղքատության հաղթահարումը տեղի կունենա նաև աշխատանքի միջոցով:
Նարեկ Մկրտչյանն ասաց, որ նոր գնահատման համակարգը հնարավորություն կտա այլ տարբերակով մոտենալ հարցին: Նշեց, որ 40 000 աշխատունակ մարդ ընդգրկված է նպաստ ստացողների համակարգում: Սա այն դեպքում, երբ երկրում աշխատուժի պակաս կա:
Մեկնաբանել