ՍԱՏՄ մամուլի ծառայությունը հայտնում է, որ Արարատի մարզի Հայանիստ համայնքում գործող «Սամվել Լաբլաջյան» ԱՁ-ին պատկանող ձկնաբուծարանում ՀՀ սննդամթերքի անվտանգության տեսչական մարմնի կողմից իրականացված մշտադիտարկման արդյունքում հայտնաբերվել են մի շարք խախտումներ:

«Մասնավորապես՝

1. ընկերությունը չի վարում փաստաթղթաբանություն իխտիոպաթոլոգիական հետազոտությունների, ջրի հիդրոքիմիական հետազոտությունների, անասնահամաճարակային վիճակի մասին,
2. չունի իխտիոպաթոլոգիական հետազոտությունների լաբորատորիա,
3. ձկան հիվանդությունների ու անկումների մասին չի տեղեկացրել ՍԱՏՄ-ին,
4. չի վարվում գույքի, սարքավորումների, որսալու սարքերի, արտահագուստի ախտահանման մատյան:

Մշտադիտարկման ընթացքում կատարվել է նմուշառում և տրվել լաբորատոր հետազոտության: Ըստ փորձաքննության արդյունքների՝ ձկան մեջ հայտնաբերվել են մանրէաբանական Aeromonas hidrophila բակտերիալ և սապրոլեգնիոզ սնկային հիվանդությունները: Մակաբուծական հետազոտությամբ ինվազիոն հիվանդության հարուցիչներ չեն հայտնաբերվել:

Ըստ տնտեսավարողի հայտարարության՝ անկումները սկսվել են հոկտեմբերի 29-ից, մոտավոր հաշվարկներով թաղվել է 58 տոննա ձուկ:

Տնտեսավարողին տրվել են հանձնարարականներ հստակ փաստաթղթավորման, մատյանների վարման, ախտահանություն իրականացնելու վերաբեյալ»,-նշված է հաղորդագրությունում։

Այս ձկնաբուծարանին «Հետքը» անդրադարձել է՝ «Արամ Հարությունյանի նախկին վարորդն ու եղբայրը տիրանում են ուրիշների հողերին․ ձկնաբուծարան են կառուցում» վերնագրով հետաքննությունում։ Մենք պարզել էինք, թե ինչպես է վարչապետ Նիկոլ Փաշինյանի ենթակայությամբ գործող Բնապահպանության և ընդերքի տեսչական մարմնի պաշտոնյա Արմեն Լաբլաջյանի եղբայրը՝ Սամվել Լաբլաջյանը, տիրացել այլոց հողերին, տեղում ապօրինի ձկնաբուծարան կառուցել։