![](/static/articles/15/14/02/l-V7owYZ9uyA.jpg)
Ծայրահեղ ծանր վիճակում գտնվող երեխային Արցախից չեն կարողանում տեղափոխել Երևան
Առողջապահության նախարարությունը կրկին ահազանգում է. Հանրապետությունում երկու տասնյակից ավելի մարդ գտնվում է ռեանիմացիոն բաժանմունքում։ Ոմանց բուժումը անհրաժեշտ է շարունակել ՀՀ-ում, սակայն Արցախը Հայաստանին կապող միակ ճանապարհն արդեն 8 օր փակ է։ Այսօր առաջին անգամ, Կարմիր Խաչի միջազգային կոմիտեի միջնորդությամբ, մեկ հիվանդ, հրատապ վիրահատության անհրաժեշտությամբ, տեղափոխվել է Երևան։
62-ամյա տղամարդը սրտային պաթոլոգիայով տեղափոխվել է ՀՀ մասնագիտացված բժշկական կենտրոն: Հանրապետական բժշկական կենտրոնի տնօրեն Մհեր Մուսայելյանի խոսքով՝ հիվանդը շտապ վիրահատության կարիք ունի։
«Հիվանդին դետեմբերի 12-ին պետք է տեղափոխեին Երևան՝ սրտի բաց վիրահատության։ Քանի որ ճանապարհը փակվեց նա դեղորայքային բուժում էր ստանում և սպասում։ Բայց ճանապարհն առ այսօր չի բացվել, իսկ վիրահատության անհրաժեշտությունը մեծացել է։ Այսօր որոշվեց, և նրան ուղարկեցինք «Նորք- Մարաշ» բժշկական կենտրոն՝ վիրահատության»,- ասում է Մհեր Մուսայելյանը։
Մենք գործել ենք որպես չեզոք միջնորդ՝ ասում է ԿԽՄԿ արցախյան գրասենյակի հաղորդակցության բաժնի պատասխանատու Էթերի Մուսայելյանը:
«Մենք պատրաստակամություն ենք հայտնում շարունակելու նման աջակցությունը։ Ավելացնեմ, որ Կոմիտեն չի որոշում, թե որ հիվանդը պետք է տեղափոխվի։ Որոշումը կայացնում են բժիշկները»,- ասում է Էթերի Մուսայելյանը։
Հանրապետական բժշկական կենտրոնում տեղափոխման կարիք ունեցող այլ հիվանդներ չկան։ Փոխարենը, «Արևիկ» մանկական բուժմիավորումում պայքարում են 4 ամսական տղայի կյանքի համար։ Բուժմիավորման տնօրեն Կարեն Մելքումյանն է մանրամասնում.
«Երեխան ունի «Վիսցերալ լեշմանյոզ» ախտորոշումը։ 4 ամսական է։ Նրա վիճակը գնահատվում է ծայրահեղ ծանր։ Ներկայում մեր երևանյան գործընկերների հետ փորձում ենք նրա բուժումը կազմակերպել մաքսիմալ լիարժեք»։
Երեխայի ծնողները չկարողացան խոսել։ Շատ ծանր շրջան է նրանց համար։
«Այս ախտորոշմամբ երեխաները մշտապես բուժում են ստացել Երևանում, քանի որ նրանց անհրաժեշտ է յուրահատուկ ուշադրություն»,- ասում է Կարեն Մելքումյանը։
Բժիշկներն այսօր Երեւանի իրենց գործընկերների հետ կապը պահում են առցանց:
«Բուժումը կազմակերպում ենք այստեղ։ Դեղորայքը մենք ունենք։ Բայց իրենց բուժումը, այսպես ասած, հիվանդության բնութագրից կախված, շատ սպեցիֆիկ է։ Քանի որ այժմ չունենք հնարավորություն տեղափոխելու, ստիպված բուժումը կազմակերպում ենք Ստեփանակերտում»,- ասում է Կարեն Մելքումյանը։
«Արևիկ» բուժմիավորումում ևս 10 երեխա վերակենդանացման բաժանմունքում է։ Նրանց վիճակը գնահատվում է կայուն ծանր։ Առաջին բուժօգնության համար անհրաժեշտ դեղերի և բժշկական պարագաների պակաս այս պահին չկա, բայց մատակարարումը շարունակում է մնալ անհնարին:
Ճանապարհի փակումից հետո բժշկական հաստատություններում դադարեցվել են պլանային վիրահատությունները։ Դրանք իրականացվում են միայն խիստ անհրաժեշտության դեպքում։
Վիկտորյա Սարգսյան, Անի Աբաղյան
Արցախի հանրային ռադիոյի թղթակիցներ
Մեկնաբանել