Եվրամիության երկրները համաձայնության են եկել գազի գնի առավելագույն շեմ սահմանելու շուրջ, որով եվրոպական հարթակներում կարող են կնքվել գազի վերաբերյալ գործարքները։ Այդ մասին հայտնում է Reuters գործակալությունը։

Սահմանափակումներն ուժի մեջ կմտնեն, եթե Նիդերլանդներում գտնվող խոշորագույն TTF հաբում գազի գինը երեք օր շարունակ 1 մեգավատտ/ժամը գերազանցի 180 եվրոն։ Գների սահմանափակման որոշումն ուժի մեջ կմտնի փետրվարի 15-ից։ Վերջնական գինը շատ ավելի ցածր է, քան ի սկզբանե առաջարկում էր Եվրոպական հանձնաժողովը (275 եվրո)։

Եվրոպական միությունում գազի գնի առավելագույն շեմը ներդրվում է որպես գնաճի դեմ պայքարի միջոց, որը վերջին ամիսներին գտնվում է պատմական առավելագույնի սահմաններում։

Եվրոպայում գազի գնի էական աճը պայմանավորված է նաև Ռուսաստանից դրա ներկրման ծավալների էական կրճատման հետ։ Գազի գնի վերին շեմի դեմ էին հանդես գալիս Նիդերլանդները, Ավստրիան, Հունգարիան, ինչպես նաև ԵՄ-ում վառելիքի ամենախոշոր սպառողը՝ Գերմանիան։ Այս երկրները մտահոգություններ ունեն, որ վառելիքի գնի ձևավորման հարցում ոչ շուկայական միջամտությունը կարող է հանգեցնել անկանխատեսելի հետևանքների։

Իլյուստրացիան՝ REUTERS/Dado Ruvic/Illustration/File Photo