HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արմեն Միրզոյան

Ռուսաստանն ու Ադրբեջանն ափսոսում են, որ Հայաստանը չի մասնակցի եռակողմ հանդիպմանը

Ռուսաստանի արտաքին գործերի նախարար Սերգեյ Լավրովն ու Ադրբեջանի արտաքին գործերի նախարար Ջեյհուն Բայրամովը ափսոսում են, որ Երևանը հրաժարվել է դեկտեմբերի 23-ին Մոսկվայում կայանալիք հանդիպումից, որին մասնակցելու էին Հայաստանի և Ադրբեջանի արտաքին գործերի նախարարները ու քննարկելու էին խաղաղության պայմանագրի թեման։ Այդ մասին նշվում է ՌԴ և Ադրբեջանի ԱԳ նախարարների հեռախոսազրույցի վերաբերյալ ռուսական արտաքին քաղաքական գերատեսչության տարածած հաղորդագրության մեջ։

«Ափսոսանք են հայտնել դեկտեմբերի 23-ին, խաղաղության պայմանագրի նախապատրաստման հարցերը քննարկելու համար, Մոսկվայում կայանալիք Ադրբեջանի և Հայաստանի արտաքին գործերի նախարարների հանդիպմանը մասնակցելուց հրաժարվելու Երևանի որոշման վերաբերյալ»,- նշվում է հայտարարության մեջ։

Լավրովն ու Բայրամովը քննարկել են Լեռնային Ղարաբաղում առկա իրավիճակը, Լաչինի միջանցքի փակման շուրջ ստեղված իրավիճակն ու «տարածաշրջանում հանքերի շահագործման շուրջ կողմերի տարաձայնությունները»։

«Լավրովն ընդգծել է Լաչինի միջանցքով Լեռնային Ղարաբաղի և Հայաստանի միջեւ անարգել կապի ապահովման մասին եռակողմ պայմանավորվածությունների անշեղ պահպանման անհրաժեշտությունը»,- ասված է ռուսական կողմի հաղորդագրության մեջ։

Ադրբեջանի արտաքին գործերի նախարարության տարածած հաղորդագրության մեջ էլ նշվում է, որ Բայրամովը Լավրովին ասել է, որ «ադրբեջանական կողմը, պարտավորություններին համապատասխան, երաշխավորում է Լաչինի միջանցքով քաղաքացիների, տրանսպորտային միջոցների և բեռների անվտանգությունը»։ Բայրամովը հայտարարել է, թե, իբր, Լաչինի միջանցքը բաց է։ «Բացի այդ, ընդգծվել է, որ ադրբեջանցի ակտիվիստների բողոքի ակցիան իրականացվում է Ադրբեջանի տարածքում հայերի անօրինական տնտեսական գործունեության դեմ»,- ասված է ադրբեջանական կողմի հայտարարության մեջ։

Հիշեցնենք, այսօր ՀՀ ԱԳՆ մամուլի խոսնակ Վահան Հունանյանը հայտարարել էր, որ հայկական կողմը խնդրել է հետաձգել Մոսկվայում նախատեսված Միրզոյան-Բայրամով հանդիպումը։ «Ակնհայտորեն ԱԳ նախարար Արարատ Միրզոյանի աշխատանքային առաջնահերթությունն այս պահին 2020 թ նոյեմբերի 9-ի եռակողմ հայտարարությանը համապատասխան Լաչինի միջանցքի անխոչընդոտ վերագործարկման և Լեռնային Ղարաբաղում հումանիտար ճգնաժամի արդյունքում ստեղծված խնդիրների հասցեագրումն է, ինչից ելնելով՝ հայկական կողմը խնդրել է հետաձգել Մոսկվայում նախատեսված հանդիպումը»,- նշել էր ԱԳՆ խոսնակը։

Լուսանկարը՝ ՌԴ ԱԳՆ մամուլի ծառայության

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter