Հումանիտար ճգնաժամի կառավարման հարցում ԼՂ ժողովրդին աջակցելու նպատակով փոխվարչապետ Տիգրան Խաչատրյանի գլխավորությամբ աշատանքային խումբ կձևավորվի, որի խնդիրը ԼՂ իշխանությունների հետ հումանիտար հարցերի մշտադիտարկումը և հրատապ աջակցություն ցուցաբերելն է լինելու, այդ թվում՝ միջազգային կառույցների աջացությամբ։ Այս մասին Կառավարության նիստի մեկնարկին հայտնեց վարչապետ Նիկոլ Փաշինյանը։

Աշխատանքային խմբում կընդգրկվեն Առողջապահության, Աշխատանքի և սոցիալական հարցերի, Տարածքային կառավարման և ենթակառուցվածքների նախարարները, նաև՝ այլլ գերատեսչությունների ներկայացուցիչներ։

Վարչապետ Նիկոլ Փաշինյանը հայտնեց, որ 4 մլրդ դրամի լրացուցիչ աջակցություն կտրամադրվի Լեռնային Ղարաբաղին։

«Լաչինի միջանցքի՝ շուրջ 18 օր փակ լինելու հետևանքով Լեռնային Ղարաբաղում հումանիտար իրավիճակն օր օրի սրվում է: ԼՂ-ի հարյուրավոր ընտանիքներ շարունակում են մնալ կիսված՝ հայտնված լինելով բլոկադայի տարբեր կողմերում: Առաջին անհրաժեշտության ապրանքների պակասը դառնում է ավելի ու ավելի զգալի: Խանութների ցուցափեղկերը դատարկվել են, հանրային օբյեկտներում սննդի մատակարարման սահմանափակումներ են մտցնում, հանրությունը գտնվում է սոցիալ-հոգեբանական ծանր վիճակում»,- նշեց նա։

Վարչապետը կրկին արձանագրեց՝ Լաչինի միջանցքի փակումը նոյեմբերի 9-ի եռակողմ հայտարարւթյան 6-րդ կետի կոպիտ խախտում է։ Այս կետով պարտավորություն են կրում կողմերից երկուսը՝ Ադրբեջանի Հանրապետությունը և Ռուսաստանի Դաշնությունը։ 

«Իրավիճակի հստակ պարզաբանմամբ պետք է հանդես գա ՌԴ խաղաղապահ զորախումբը»

«Միջազգային հարթակներում Ադրբեջանի կողմից շրջանառվող այն դրույթը, թե Լաչինի միջանցքը բաց է երթևեկության համար, սին է։ Լաչինի միջանցքը փակվել է Ադրբեջանի կողմից, և սա նրա միջազգային պարտավորության կոպտագուն խախտում է։

Եթե նույնիսկ հիմնվենք Ադրբեջանի պրոպագանիստական վարկածի վրա, թե միջանցքը փակել են «էկոակտիվիստները», եռակողմ հայտարարության 6-ր կետով՝ Լաչինի միջանցք քաղաքացիների, տրանսպորտային միջոցների և բեռների անվտանգ երթևեկությունն ապահովելը Ադրբեջանի ուղիղ պարտավորությունն է։ Այս պայմաններում իրավիճակի հստակ պարզաբանմամբ պետք է հանդես գա ՌԴ խաղաղապահ զորախումբը և Ռուսաստանի Դաշնությունը, որն անվտանգային կոնկրետ պարտավորւթյուններ է ստանձնել ԼՂ ժողովրդի առաջ։

Ո՞րն է իրադրության Ռուսաստանի գնահատականը։ Ո՞րն է Լաչինի միջանցքը վերականգնելու նրա պլանը և ճանապարահային քարտեզը։ Սրանք հարցեր են, որոնց պատասխանները Հայաստանի Հանրապետության և ԼՂ  հայությունը սպասում է Ռուսաստանից, որը հիշեցնեմ՝ նաև ՄԱԿ-ի Անվտանգության խորհրդի մշտական անդամ է։ Եթե ՌԴ-ն օբյեկտիվ կամ սուբյեկտիվ պատճառներով չի կարողանում ապահովել ԼՂ-ում կայունությունն ու անվտանգությունը, կարծում եմ՝ ինքը պիտի քննարկում նախաձեռնի ՄԱԿ-ի ԱԽ-ում, և ԼՂ-ում Ռուսաստանի խաղաղապահ զորախմբին ՄԱԿ-ի Ախ-ի մանդատով օժտելու կամ ԼՂ լրացուցիչ բազմազգ խաղաղապահ զորախումբ ուղարկելու հարց բարձրացնի»,- ասաց Փաշինյանը։

Կառավարության ղեկավարն ընդգծեց՝ նման հարցադրում ծագում է նաև այն պատճառով, որ Լաչինի միջանցքի փակումն Ադրբեջանի կողմից ԼՂ-ում ՌԴ խաղաղապահ զորախմբի պատասխանատվության գոտի ներխուժման առաջին դեպքը չէ։ 

«Ադրբեջանը հերթական ռազմական սադրանքն է պատրաստում, այդ թվում՝ Լեռնային Ղարաբաղում»

«Սրան նախորդել են Փառուխի և Խծաբերդի իրադարձությունները, որի հետևանքով ՀՀ շուրջ 3 տասնյակ քաղաքացիներ շարունակում են մնալ գերեվարված։

Բոլոր նախանշանները կան՝ պնդելու, որ Ադրբեջանը հերթական ռազմական սադրանքն է պատրաստում, այդ թվում՝ Լեռնային Ղարաբաղում, և իրադրության զարգացումները հրատապ պատասխանի սպասող հարցեր են բարձրացնում ԼՂ-ում ՌԴ խաղաղապահ զորախմբի գործունեության հետ կապված»,- հայտնեց Փաշինյանը՝ նշելով, որ ՀՀ-ն ԼՂ-ում ՌԴ խաղաղապահ զորախմբի ներկայության համոզված կողմնակիցն է և այդ ներկայության ջատագովը։ 

«Մեզ համար անընդունելի է ԼՂ հայաթափման լուռ վկա դառնալու՝ ՌԴ խաղաղապահ զորախմբի ավելի ու ավելի տեսանելի դարձող գործելակերպը»

«Բայց մեզ համար անընդունելի է ԼՂ հայաթափման լուռ վկա դառնալու՝ ՌԴ խաղաղապահ զորախմբի ավելի ու ավելի տեսանելի դարձող գործելակերպը։ Ամեն դեպքում, մենք այս հարցերի պարզաբանման շուրջ պետք է սերտորեն աշխատենք ՌԴ և միջազգային այլ գործընկերների հետ՝ իրրադրության հետագա սրում թույլ չտալու և համապարփակ կարգավորումների հասնելու նպատակով»,- նշեց Նիկոլ Փաշինյանը։