Գլխավոր դատախազությունը Վարչական դատարան հայցադիմումը ներկայացրել է հունվարի 4-ին և արդեն ընդունվել է վարույթ: Դատարանը կիրառել է նաև հայցի ապահովման միջոց՝ արգելելով կադաստրի կոմիտեին Երևան քաղաքի Փափազյան փողոցի թիվ 89/3 հասցեում Հովսեպ Գարաբետ Մուխտարյանին պատկանող անշարժ գույքերի նկատմամբ իրավունքների պետական գրանցում կատարել:

Երևանի քաղաքապետի 2003թ. հունիսի 12-ի թիվ 1284-Ա որոշմամբ Փափազյան փողոցի վերջնամասում գտնվող 2,97 հա մակերեսով «Արաբկիր» զբոսայգին բարեկարգման, արդիականացման նպատակով անհատույց (մշտական) օգտագործման իրավունքով տրամադրվել է Արաբկիրի թաղապետարանին, իսկ 2003թ. հունիսի 20-ին վերջինիս հետ կնքվել է հողամասի անհատույց օգտագործման պայմանագիր:

• Արաբկիրի նախկին թաղապետ Ալբերտ Երիցյանն ամսական 250 հազար դրամով վարձակալել է «Մոլոկանի» այգին

Սակայն, ինչպես «Հետք»-ին հայտնում են Գլխավոր դատախազությունից, 2007թ. փետրվարի 6-ի գրությամբ Արաբկիր թաղային համայնքի ղեկավարը Երևանի քաղաքապետին հայտնել է, որ «Արաբկիր» զբոսայգու տարածքում առկա է 1500քմ տարածք, որը նպատակահարմար է բազմաբնակարան շենք կառուցելու համար: Այնուհետև խնդրել է նշված տարածքը հանել զբոսայգու գլխավոր հատակագծից, հողատարածքի նկատմամբ հողօգտագործման իրավունքը դադարեցնել և կառուցապատման նպատակով ներկայացնել մրցութային հանձնաժողովի քննարկմանը:

Երևան քաղաքի գլխավոր ճարտարապետը երկու տարբեր գրություններով չի առարկել «Արաբկիր» զբոսայգու տարածքում 0,15հա մակերեսով տարածքը զբոսայգու գլխավոր հատակագծից հանելու, դրա նկատմամբ հողօգտագործման իրավունքը դադարեցնելու և 2,82հա մակերեսով հողամասի նկատմամբ «Երևանի Արաբկիրի թաղային համայնքի ղեկավարի աշխատակազմ» համայնքային կառավարչական հիմնարկի՝ անհատույց օգտագործման իրավունքով անվամբ ձևակերպելու վերաբերյալ: 

Բացի այդ՝ Երևան քաղաքի գլխավոր ճարտարապետը հայտնել է նաև, որ 0,15հա մակերեսով հողամասը այգու սահմաններից հանելու դեպքում այն ընդգկված չի լինի Հողային օրենսգրքի՝ սահմանափակումների ցանկում:

• «Արաբկիր» մանկական այգու 1 քմ-ը վարձակալել են 160 դրամով. ովքեր են վարձակալները

Այդ ամենը հաշվի առնելով՝ Երևանի քաղաքապետի 2007թ. ապրիլի 03-ի որոշմամբ Փափազյան փողոցի վերջնամասում «Արաբկիր» զբոսայգու 2,97 հա հողամասից դադարեցվել է Արաբկիրի թաղապետարանի հողօգտագործման իրավունքը 0,15հա չափով: Նույն որոշմամբ զբոսայգու մնացած 2,82հա մակերեսով հողամասի սահմանները որոշվել են Երևանի քաղաքապետարանի աշխատակազմի ճարտարապետության և քաղաքաշինության վարչության կողմից տրված գլխավոր հատակագծով՝ չեղյալ համարելով Երևանի քաղաքապետի որոշման հիման վրա տրված գլխավոր հատակագիծը:

Քաղաքապետի 2007թ. սեպտեմբերի 28-ի որոշմամբ Հայաստանի Հանրապետության սեփականությունը հադիսացող, Փափազյան փողոցի թիվ 89/3 հասցեում գտնվող 89,5քմ ընդհանուր մակերեսով սրճարանը ճանաչվել է օրինական և կառույցի համար առանձնացված 1500քմ մակերեսով հողամասի հետ միասին ուղղակի եղանակով օտարվել կառույցն իրականացրած անձ Արմեն Երիցյանին: Դրա վերաբերյալ Անշարժ գույքի կադաստրի պետական կոմիտեի աշխատակազմի տարածքային ստորաբաժանման կողմից 2007թ. հոկտեմբերի 18-ի իրականացվել է իրավունքների պետական գրանցումը: Այնուհետև 2008թ. ապրիլի 10-ին այն օտարվել է Հովսեպ Մուխտարյանին, որի վերաբերյալ կատարվել է գրանցումը: 

Նույն որոշմամբ նաև դադարեցվել է Երևանի քաղաքապետի որոշմամբ Երևանի քաղաքապետարանի տնօրինությանը թողնված հողամասի անհատույց օգտագործման իրավունքը 1500 քմ մակերեսի չափով:

Ըստ դատախազության՝ Երևանի քաղաքապետի 2007թ. ապրիլի 03-ի թիվ 677-Ա որոշումն ընդունել է ոչ իրավասու վարչական մարմինը, ինչի հիմքով էլ պահանջում են առոչինչ ճանաչել: Որպես հետևանք անվավեր ճանաչել Արմեն Երիցյանի և Հովսեպ Մուխտարյանի անվամբ իրականացված իրավունքների պետական գրանցումները:

Դատախազության դիրքորոշումն այն է, որ Երևանի գլխավոր հատակագիծը և դրանում կատարվող փոփոխությունները հաստատում է ոչ թե քաղաքապետարանը, այլ կառավարությունը: Բացի այդ, քաղաքաշինության, բնակարանային և կոմունալ տնտեսության բնագավառներում Երևանի քաղաքապետը սահմանված կարգով կազմում է Երևան քաղաքի գլխավոր հատակագիծը և հողերի օգտագործման սխեման ու ներկայացնում կառավարության հաստատմանը:

Գլխավոր դատախազությունից պարզաբանում են, թե ինչու են հայցադիմումը ներկայացրել կառավարության դեմ: Մասնավորապես, հայտնում են, որ 2002թ. հոկտեմբերի 3-ի թիվ 1788-Ն որոշմամբ Կառավարությունը որոշել է ստեղծել «Երևանի քաղաքապետարանի աշխատակազմ» պետական կառավարչական հիմնարկը: Սակայն 2009թ. ապրիլի 30-ին որոշմամբ ուժը կորցրած է ճանաչվել կառավարչական հիմնարկ ստեղծելու որոշումը: Այսինքն՝ դադարեցվել է «Երևանի քաղաքապետարանի աշխատակազմ» պետական կառավարչական հիմնարկի գործունեությունը: Օրենքով կարգավորվում է, որ գործունեությունը դադարեցրած պետական մարմնի քաղաքացիական իրավունքները, պարտականությունները և ամրացված գույքը փոխանցվում են Հայաստանի Հանրապետությանը՝ ի դեմս Կառավարության: