Նեպալում քաղաքացիական ինքնաթիռ է կործանվել. զոհվել է 72 մարդ
ATR 72 քաղաքացիական ինքնաթիռը, որն իրականացնում էր Կատմանդու-Պոկհարա ավիաթռիչքը, կործանվել է Պոկհարա քաղաքի միջազգային օդանավակայանի տարածքում։ Այդ մասին հայտնում է The Kathmandu Post-ը՝ հղում անելով Yeti Airlines ընկերության ներկայացուցչին։ Նեպալի իշխանությունների պնդմամբ՝ ինքնաթիռում գտնվող բոլոր 72 անձինք զոհվել են։
Սոցիալական ցանցերում հրապարակվում են ավիաաղետի վայրից տեսանյութեր ու լուսանկարներ։ Համացանցում տարածվել է նաև ընկնող ինքնաթիռի տեսանյութը։ Այնտեղ երևում է, թե ինչպես է Yeti Airlines-ի ինքնաթիռը կորցնում բարձրությունը, պոկվում է ձախ թևը և ինքնաթիռն ընկնում է գետնին։
Ավիաընկերության տվյալներով՝ ինքնաթիռում եղել է 68 ուղևոր և անձնակազմի 4 անդամ։ Ուղևորների թվում 15-ը եղել են օտարերկրացիներ. 5-ը՝ Հնդկաստանից, 4-ը՝ Ռուսաստանից, 2-ը՝ Հարավային Կորեայից, ինչպես նաև 1-ական ուղևորներ Իռլանդիայից, Արգենտինայից, Ավստրալիայից և Ֆրանսիայից։ Ինքնաթիռում եղել է նաև 53 նեպալցի։
Նեպալում ՌԴ դեսպանությունը հաստատել է ինքնաթիռում չորս ռուսաստանցիների գտնվելու փաստը։
Օդանավակայանը փակ է, իրականացվում են փրկարարական աշխատանքներ։ Պարզվում են նաև ավիավթարի պատճառները։
दुखद खबर. नेपाल के Kathmandu से Pokhara जा रहा विमान क्रैश. 72 लोग थे सवार. pic.twitter.com/KMWMNQdLCZ
— Abhishek Anand Journalist 🇮🇳 (@TweetAbhishekA) January 15, 2023
Նեպալի վարչապետ Պումպա Քամալ Դահալը նախարարների կաբինետի արտահերթ նիստ է հրավիրել։ Նա ներքին գործերի նախարարությանը, անվտանգության ծառայության աշխատակիցներին ու կառավարական բոլոր հաստատություններին հանձնարարել է իրականացնել փրկարարական արդյունավետ գործողություններ։
2022 թվականի սեպտեմբերին Նեպալի լեռներում կործանվել էր Tara Air ավիաընկերության DHC-6-300 Twin Otter քաղաքացիական ինքնաթիռը, որի հետևանքով էլ զոհվել էր առնվազն 20 մարդ։
Լուսանկարը՝ Yunish Gurung / Associated Press
Մեկնաբանել