![](/static/articles/15/24/15/l-aBybCQiN4S.jpg)
Ժաննա Անդրեասյանը հանդիպել է Մեքսիկա-Հայաստան բարեկամության խմբի նախագահի գլխավորած պատվիրակությանը
ԿԳՄՍ նախարար Ժաննա Անդրեասյանն ընդունել է Մեքսիկայի Պատգամավորների պալատի Մեքսիկա-Հայաստան բարեկամության խմբի նախագահ Բերենիսե Խուարես Նավառետեի գլխավորած պատվիրակությանը: Հանդիպմանը ներկա են եղել ԿԳՄՍ նախարարի տեղակալ Արթուր Մարտիրոսյանը և Մեքսիկական Միացյալ Նահանգներում ՀՀ արտակարգ և լիազոր դեսպան Ն.Գ. Արմելլա Շաքարյանը:
Կողմերը քննարկել են կրթության, գիտության, մշակույթի և սպորտի ոլորտներում համագործակցության խթանման, տարբեր ուղղություններով փորձի փոխանակման կարևորության վերաբերյալ հարցեր:
ԿԳՄՍ նախարար Ժաննա Անդրեասյանը, կարևորելով երկու երկրների միջև ձևավորված բարեկամական հարաբերությունների ամրապնդումը, նշել է, որ անցած տարի սեպտեմբերին ԿԳՄՍ նախարարության պատվիրակությունը մասնակցել է Մեխիկոյում անցկացվող ՅՈՒՆԵՍԿՕ-ի «Մշակութային քաղաքականության և կայուն զարգացման համաշխարհային համաժողովին» և վերադարձել դրական տպավորություններով ու համագործակցության մեծ ակնկալիքներով:
Նախարար Ժաննա Անդրեասյանը նշել է, որ մշակվել և ներկայում ներպետական փոխհամաձայնեցման փուլում է «Հայաստանի Հանրապետության կրթության, գիտության, մշակույթի և սպորտի նախարարության և Մեքսիկական Միացյալ Նահանգների մշակույթի նախարարության միջև 2023-2026 թվականների մշակութային համագործակցության մասին» գործնական ծրագիրը, որը հնարավորություն կընձեռի իրականացնելու համատեղ աշխատանքներ և մի շարք միջոցառումներ:
Մեքսիկայի Պատգամավորների պալատի Մեքսիկա-Հայաստան բարեկամության խմբի նախագահ Բերենիսե Խուարես Նավառետեն իր հերթին շնորհակալություն է հայտնել ջերմ ընդունելության և հյուրընկալության համար` շեշտելով, որ 2023 թվականին լրանում է Հայաստան-Մեքսիկա երկկողմ դիվանագիտական հարաբերությունների հաստատման 31-ամյակը, ուստի առանձնակի կարևորություն ունի փոխգործակցության զարգացումը հատկապես մշակույթի և կրթության ոլորտներում։
Մեքսիկական կողմը նշել է նաև, որ տպավորված է հատկապես Հայաստանում «Թումո» ստեղծարար տեխնոլոգիաների կենտրոնի գործունեությամբ, որը կարող է լավ օրինակ դիտարկվել բոլոր երկրների կրթական համակարգերի համար:
«Մենք անպայման կփորձենք այն տեղայնացնել նաև Մեքսիկայում»,- նշել է Մեքսիկա-Հայաստան բարեկամության խմբի նախագահը:
Հանդիպման ընթացքում Ժաննա Անդրեասյանը խոսել է նաև Լեռնային Ղարաբաղի շրջափակման հետևանքով ստեղծված հումանիտար ճգնաժամի և կրթության իրավունքի խախտման խնդիրների մասին, որոնք անդառնալի հետևանք են թողնում մարդու իրավունքների վրա: Նախարարն անդրադարձել է նաև ներկայում Ադրբեջանի վերահսկողության ներքո գտնվող Լեռնային Ղարաբաղի հայկական մշակութային ժառանգության պահպանման հարցին:
Հանդիպման ընթացքում անդրադարձ է եղել նաև կրթական և մշակութային միջոցառումների իրականացման, մշակութային տուրիզմի զարգացման, համատեղ աշխատանքային ծրագրերի, փորձի փոխանակման, հաղորդակցման ակտիվացման վերաբերյալ մի շարք այլ հարցերի:
Մեկնաբանել