Մինսկում՝ ԱՊՀ գործադիր կոմիտեի  շենքում` Բելառուսական նախագահական գրադարանի մասնաճյուղում, մայիսի 28–ից հունիսի 6–ը ՀՀ Հանրապետության տոնի կապակցությամբ ՀՀ դեսպանության և Բելառուսի Հանրապետությունում, ԱՊՀ կանոնադրական և այլ մարմիններում ՀՀ մշտական ներկայացուցչության աջակցությամբ կազմակերպվել է հայկական գրքի ցուցահանդես:

Այդ օրերին ԱՊՀ գործադիր կոմիտեի աշխատակիցները և ԱՊՀ երկրների մշտական ներկայացուցիչները, Բելառուսում հավատարմագրված դիվանագետները ծանոթացան Հայաստանի տարբեր հրատարակչությունների գրքերին: Միջոցառման ընթացքում ներկաները հնարավորություն ունեցան դիտելու Բելառուսի նախագահական գրադարանի արխիվում, ՀՀ դեսպանության գրադարանի գրապահոցներում պահվող  Հայոց  պատմության մասին պատմող գրքերին, հոդվածներին, լուսանկարներին, ինչպես նաև  հայ երեխաների ձեռքերով պատրաստված աշխատանքներին:

Ցուցահանդեսում համառոտ ներկայացված էր հայոց պետականության պատմությունը վաղ պետական կազմավորումներից մինչև մերօրյա Հայաստանի Հանրապետությունը:

Ներկայացնելով ցուցահանդեսը` ՀՀ դեսպան Արմեն Խաչատրյանն իր խոսքում  ներկաներին պատմեց Հայոց պատմության ու մշակույթի ամենաուշագրավ  դրվագների, Մատենադարանի հոգևոր գանձարանի, քրիստոնեական առաքելության, ՅՈւՆԵՍԿՈՅԻ կողմից Երևանը գրքի մայրաքաղաք հայտարարելու մասին:

Կարևորվեց Սարդարապատի, Բաշ-Ապարանի և Ղարաքիլիսայի ճակատամարտերի նշանակությունը, նրանց դերը Հայաստանի Առաջին Հանրապետության ստեղծման և Հայոց պետականության վերածննդի գործում: Այս մասին հայտնում է ԱԳՆ մամուլի ծառայությունը: