Այսօրվա նիստում կառավարությունն իր նախկին որոշումներից մեկում կատարել է փոփոխություններ, որոնց համաձայն՝ 2012 թվականին ՀՀ գյուղատնտեսության, մշակույթի, էներգետիկայի և բնական պաշարների նախարարությունների ենթակայությամբ գործող 10, 2013 թվականին` առողջապահության նախարարության ենթակայության 11 միջին մասնագիտական ուսումնական հաստատությունները կգործեն կրթության և գիտության նախարարության ենթակայության ներքո, ինչը հնարավորություն կտա իրականացնել միասնական կրթական քաղաքականություն։

Այսպիսով, պետական կրթական չափորոշիչների և ծրագրերի պահանջներին համապատասխան կբարելավվի երկրի 55 միջին մասնագիտական ուսումնական հաստատությունների կառավարման արդյունավետությունը, կբարելավվի միջին մասնագիտական կրթության և ուսուցման որակը։

Այսօր փոփոխություն է կրել կառավարության ավելի վաղ ընդունած որոշումներից ևս մեկը, որով «Մարի Իզմիրլյանի անվան մանկատուն» ՊՈԱԿ-ի գործունեությունը համապատասխանեցվել է խնամք և պաշտպանություն իրականացնող հաստատությունների տիպերին։ Նախատեսվում է մանկատանն իրականացնել կենտրոնական նյարդային համակարգի օրգանական ու ֆունկցիոնալ ախտահարումով, բնածին և ձեռքբերովի ֆիզիկական և մտավոր խնդիրներ ունեցող 0-18 տարեկան երեխաների խնամքը և դաստիարակությունը, նրանց իրավունքների և օրինական շահերի պաշտպանությունը։

Հաջորդ որոշման փոփոխությամբ գործադիրը «Իրավախախտում կատարած անչափահասների հատուկ ստեղծագործական կենտրոն» ՊՈԱԿ-ը, որը գործում է մշակույթի նախարարության ենթակայությամբ, հանձնել է արդարադատության նախարարության իրավասությանը, ինչը թելադրված է անչափահաս դատապարտյալների հետ տարվող սոցիալ-հոգեբանական, հանցագործությունների կանխարգելմանն ուղղված աշխատանքն այս գերատեսչության կողմից իրականացնելու նպատակահարմարությամբ։ Կազմակերպությանն անհատույց օգտագործման իրավունքով տրամադրվելու է նաև գրասենյակային տարածք։ Այս մասին տեղեկացնում է կառավարության մամուլի ծառայությունը: