![](/static/articles/15/29/88/l-H9xiyJrcmI.jpg)
Սեյրան Օհանյանը զրկվեց պատգամավորական անձեռնմխելիությունից
Ազգային ժողովը 68 կողմ, 0 դեմ ձայնով համաձայնություն տվեց «Հայաստան» խմբակցության պատգամավոր Սեյրան Օհանյանի նկատմամբ քրեական հետապնդում հարուցելու մասին գլխավոր դատախազի միջնորդությանը:
107 պատգամավորներից քվեարկությանը մասնակցել է 68-ը, բոլորը՝ իշխող «Քաղաքացիական պայմանագիր» խմբակցությունից:
Ըստ դատախազի միջնորդության՝ Օհանյանի պաշտոնավարման օրոք Պաշտպանության նախարարությանը պատկանող բազմաթիվ շինություններ շուկայականից ցածր գներով վաճառվել են՝ վնաս պատճառելով պետությանը։
«Զբաղեցնելով Պաշտպանության նախարարի պաշտոնը, խմբային շահերից ելնելով, պաշտոնեական դիրքն օգտագործել է ծառայության շահերին հակառակ, չի կատարել իր ծառայողական պարտականությունները, որն անզգուշությամբ առաջացրել է ծանր հետևանքներ»,- նշված է միջնորդագրում:
«Գլխավոր դատախազի երկրորդ միջնորդության վերաբերյալ Նարեկ Բաբայանը հայտնել է, որ գաղտնի քվեարկությանը մասնակցել է 66 պատգամավոր, որոնք կողմ են քվեարկել: ԱԺ «Քաղաքացիական պայմանագիր» խմբակցության 2 պատգամավոր չեն ունեցել պետական եւ ծառայողական գաղտնիքին առնչվելու թույլտվություն, հետեւաբար չեն մասնակցել քվեարկությանը:
Երրորդ գաղտնի քվեարկությանը մասնակցել է 68 պատգամավոր: Սեյրան Մուշեղի Օհանյանի նկատմամբ քրեական հետապնդում հարուցելուն համաձայնություն տալու միջնորդությանը կողմ է քվեարկել 68 պատգամավոր:
Գաղտնի քվեարկությունները տեղի են ունեցել փետրվարի 8-ին:
ՀՀ գլխավոր դատախազի ներկայացրած միջնորդությունների մանրամասները՝ կից հղումներում:
Խորհրդարանը քննարկել է ԱԺ պատգամավոր Սեյրան Օհանյանի նկատմամբ հանրային քրեական հետապնդում հարուցելուն համաձայնություն տալու մասին Գլխավոր դատախազի երրորդ միջնորդագիրը»,-նշված է ԱԺ հաղորդագրությունում։
Մեկնաբանել