![](/static/articles/15/32/68/l-AlkDNRMzai.jpg)
Փորձագետների կանխատեսմամբ՝ Ստամբուլում հնարավոր երկրաշարժը մեծ աղետի կհանգեցնի
Փորձագետները երկրաշարժ են կանխատեսում Ստամբուլում, որը զոհերի թվով կգերազանցի փետրվարի 6-ին Թուրքիայի հարավ-արևելքում գրանցված երկրաշարժը։ Այդ մասին գրում է թուրքական Hürriyet պարբերականը։
Սեյսմոլոգները նշում են, որ Ստամբուլը գտնվում է Անատոլիական ու Եվրասիական տեկտոնական սալերի սահմանագծին՝ Հյուսիսատլանտյան բեկվածքի այն հատվածից 15-20 կիլոմետր հարավ, որն անցնում է Մարմարա ծովով։ Այդպիսով, երկրաշարժը կարող է հանգեցնել աղետալի հետևանքների։ «Այլ բառերով ասած, Քահրամանմարաշում երկրաշարժը Ստամբուլի երկրաշարժի փորձն էր»,- նշվում է հոդվածում։
Ստամբուլում կա մոտ 1 միլիոն 164 հազար շինություն ու 4,5 միլիոն բնակարան, դրանցից յուրաքանչյուրում բնակվում է միջինում 3,3 մարդ։ 7,5 մագնիտուդ ու բարձր ուժգնությամբ երկրաշարժի պարագայում 13 492 շինություն մասամբ կվնասվի, իսկ 39 325 շինություն՝ ամբողջապես։
Հայտնի է, որ Ստամբուլում շինությունների 70 %-ը կառուցվել է մինչև 2000 թվականը։
7,8 մագնիտուդ ուժգնությամբ առաջին երկրաշարժը Թուրքիայում տեղի էր ունեցել փետրվարի 6-ին՝ տեղի ժամանակով 04:17-ին (Երևանի ժամանակով՝ 05:17-ին)։ Երկրաշարժի էպիկենտրոնը եղել է Գազիանթեփ քաղաքի մոտ` 17,9 կիլոմետր խորության վրա։ Դրան հաջորդել է ավելի քան 40 հետցնցում։ Այնուհետև, տեղի ժամանակով մոտ 13:30-ին (Երևանի ժամանակով՝ 14:30-ին) տեղի էր ունեցել երկրորդ երկրաշարժը, որի ուժգնությունը կազմել էր 7,7 մագնիտուդ։ Երկրաշարժի էպիկենտրոնը եղել է Քահրամանմարաշ նահանգի Էլբիստան շրջանում։
Թուրքիայում ավերվել է ավելի քան 6000 շինություն։ Թուրքիայի նախագահ Ռեջեփ Թայիփ Էրդողանը խոստացել է, որ վնասված տները պետությունը կվերականգնի մեկ տարվա ընթացքում։ Էրդողանն այս աղետն անվանել է 1939 թվականի Երզնկայի երկրաշարժի ժամանակներից ի վեր վերջին հարյուրամյակում ամենախոշորը։
Լուսանկարը՝ alphacoders.com-ից
Մեկնաբանել