![](/static/articles/01/53/48/l-wOSoNIlaDi.jpg)
ԲՀԿ-ում կադրերի անընդմեջ տեղաշարժ է
Մամուլում լուրեր են շրջանառվում, որ հնարավոր է ԲՀԿ-ին մնա սպորտի եւ երիտասարդության հարցերով նախարարի պորտֆելը, հաշվի առնելով այն, որ կուսակցության առաջնորդ Գագիկ Ծառուկյանը պահպանեց ՀԱՕԿ նախագահի պաշտոնը:
««Բարգավաճ Հայաստան» կուսակցությունը կոալիցիա կազմելու հետ կապված իր հստակ դիրքորոշումն արդեն հայտնել է, եւ որեւէ փոփոխություն չի լինելու: Թե սպորտի ու երիտասարդության հարցերի նախարարն անձամբ ինչ որոշում կկայացնի, դա արդեն քաղաքական-իրավական որոշումներից դուրս է»,- «Հետքի» հետ զրույցում ասաց ԲՀԿ լրատվության եւ հասարակայնության հետ կապերի ժամանակավոր պատասխանատու, ԱԺ պատգամավոր Տիգրան Ուրիխանյանը:
Ինչ վերաբերում է վերջին օրերին ԲՀԿ-ի ներսում կադրային փոփոխություններին, մասնավորապես` կուսակցության հասարակայնության հետ կապերի եւ լրատվության պատասխանատու Բաղդասար Մհերյանի աշխատանքից ազատվելուն եւ ԲՀԿ նախագահի մամուլի քարտուղար Խաչիկ Գալստյանի հրաժարականին, ապա, ըստ Տիգրան Ուրիխանյանի, կուսակցությունում անընդմեջ կադրերի տեղաշարժ կա, ինչը կախված է նրանից, թե ով ինչ որակի գործունեություն է իրականացնում: «Եթե իմ օգտակար գործողության գործակիցը բավարար չլինի, բնականաբար, իմ տեղը պետք է զբաղեցնի այլ մարդ, կարեւոր չի՝ նախկինը, թե այլ մարդ»,- ասաց Տ. Ուրիխանյանը:
Լրատվության պատասխանատուի խոսքերով` Բաղդասար Մհերյանն առողջական խնդիրներ ունի եւ վիրահատվելու է, սակայն նա ԲՀԿ քաղաքական խորհրդի անդամ է եւ իր տեղը կունենա կուսակցությունում, նույնը սպասվում է նաեւ Խաչիկ Գալստյանին, սակայն թե ինչ ոլորտում, Տիգրան Ուրիխանյանը դժվարացավ ասել:
«Ես շատ կուզենայի եւ հուսով եմ, որ այդպես էլ կլինի, մամուլի խոսնակի կամ լրատվության պատասխանատուի գործունեությունից բավարարված լինեն նախ լրատվամիջոցները, երկրորդը` հասարակության լայն զանգվածները: Ես ուզում եմ, որ համապատասխան տեղեր զբաղեցնող մադիկ լիարժեք կատարեն իրենց ֆունկցոնալ գործառույթային պարտականությունները: Թե նախկիններն ինչ են արել, արդարացրել են իրենց, թե ոչ, դրա գնահատականը պիտի տա այն մարդն, ով իրենց նշանակել է»,- ավելացրեց Տիգրան Ուրիխանյանը:
Նշենք, որ Խաչիկ Գալստյանի փոխարեն Գագիկ Ծառուկյանը կուսակցության նախագահի մամուլի խոսնակ է նշանակել «Կենտրոն» հեռուստաընկերության լրագրող Իվետա Տոնոյանին:
Մեկնաբանել