![](/static/articles/01/53/79/l-Lvrp1zTF1j.jpg)
Ջրահեղձ է եղել 15-ամյա նախրապանը
Երեկ ուժեղ անձրեւից առաջացած սելավաջրերը խլել են մարզի Նոր Ամանոս գյուղի բնակիչ 15-ամյա Կարեն Գալոյանի կյանքը: Նրա դին այսօր՝ ժամը 11.45-ի սահմաներում, փրկարարները գտել են տիղմերի մեջ` Արմավիրի մարզի Մեծամոր քաղաքի այգեգործական հողամասերի տարածքում:
Նոր Ամանոսի համայնքապետ Սարգիս Ալեքսանյանը «Հետքին» տեղեկացրեց, որ Գիլոյանների ընտանիքն ապրում է սոցիալապես ծանր պայմաններում: Այս սեզոնին Կարենի հայրը վճարովի դաշտում գյուղի անասուններն է պահում, տղան էլ օգնում է հորը:
Երեկ նույպես Կարենը հոր հետ գյուղի նախիրն է պահել, երբ սկսվել է հորդառատ անձրեւ ու կարկուտ: Սարգիս Ալեքսանյանի պատմելով` Կարենը հորն ասել է, թե անձրեւից հագուստները ամբողջությամբ թրջվել են, եւ ինքը մրսում է, հայրն էլ նրան տուն է ուղղարկել, որպեսզի տղան հագուստը փոխի, տաքանա ու հետ գնա դաշտ:
Տունդարձի ճանապարհին, Կարենը փորձել է հաղթահարել սելավաջրերը, սակայն, չկարողանալով անցնել, ընկել է ալիքի մեջ ու ջուրը նրան քշել տարել է:
Արդեն երեկոյան փրկարարները սկսել են որոնել տղային, սակայն նրա դիակը գտել են այսօր առավոտյան:
Նոր Ամանոսի համայնքապետի ասելով՝ Կարենը ունի եւս 3 քույր ու եղբայր, որոնցից 2-ը անչափահաս են: «Թե գյուղապետարանը, թե մարզպետարանը ընտանիքին գումար է հատկացնելու: Վաղը համայնքապետարանի կողմից կհատկացնենք 50.000 դրամ, որպեսզի կարողանան Կարենի թաղման ծախսերը հոգալ»,-ասաց Սարգիս Ալեքսանյանը:
Մեկնաբանություններ (2)
Մեկնաբանել