Այսօր ՀՀ արտակարգ իրավիճակների նախարարությունում տեղի ունեցավ հերթական ամենշաբաթյա խորհրդակցությունը, որը վարում էր ԱԻ նախարար Արմեն Երիցյանը:

ՓԾ տնօրեն, փ/ծ գեներալ-մայոր Ս. Ազարյանն առաջարկեց օձերի դեմ պայքարի հատուկ խումբ ստեղծել: Նա նաև զեկուցեց, որ Կոտայքի, Արագածոտնի մարզերում և Երևանի կենտրոնում լայն թափով սկսվել են հրշեջ մասերի վերանորոգման աշխատանքները, ավարտին է մոտենում ԱԻՆ պոլիկլինիկայի շինարարությունը: Լոռիում մեկնարկել է աղետների բշկության հրահանգիչների վերապատրաստման «Արձագանք» շվեյցարական ծրագիրը:

Երբ Արմեն Երիցյանը Բելառուսում էր, համագործակցության մի շարք ուղղություններից բացի, Բելառուսի ԱԻ նախարարի հետ համաձայնություն ձեռք բերեց, որ հայաստանցի երեխաներն էլ մասնակցեն այնտեղ կազմակերպվող պատանի փրկարարների ամառային ճամբարին: Հրավերն արդեն ստացվել է, և Հայաստանից 7 երեխա 3 չափահասի ուղեկցությամբ կմեկնի Բելառուս: Նախարարը հանձնարարեց դպրոցներում մրցույթ անցկացնել և ամառային ճամբար ուղարկել լավագույններին:

Պաշտպանության նախարարության հետ արդեն ձեռք է բերվել պայմանավորվածություն՝ խոշոր անտառային հրդեհների դեպքում հրդեհաշիջման աշխատանքներում ՊՆ ուղղաթիռները ներգրավելու վերաբերյալ: Ա. Երիցյանը հանձնարարեց ձեռք բերել օդային հրդեհաշիջման սարքեր:

Ա. Երիցյանն ԱԻՆ ճգնաժամային կառավարման պետական ակադեմիային հանձնարարեց աշխատանքներ կատարել կադետական դպրոց հիմնելու, ինչպես նաև ակադեմիայի այս տարվա շրջանավարտներին ԱԻՆ համակարգում աշխատանքի տեղավորելու ուղղությամբ: ՃԿՊԱ ռեկտորը զեկուցեց, որ արդեն սկսվել են Արցախի փրկարար ծառայության սպայական կազմի վերապատրաստման դասընթացները:

Խորհրդակցության ընթացքում «Ավիաինֆոտել» ընկերությունը նախարարին առաջարկեց հրշեջ մասերն ու հրշեջ-փրկարարական մեքենաներն ապահովել տեսախցիկներով ու տեղորոշիչ սարքերով, ինչը թույլ կտա ավտոմատ կերպով որոշել դեպքի կամ տուժածների գտնվելու վայրը, կհեշտացնի արձագանքման գործընթացի կառավարումն ու կբարձրացնի փրկարարական գործողությունների արդյունավետությունը: